Mumbai News : मुंबईतील नागरिकांसाठी एक महत्वाचे अपडेट समोर येत आहे. खरेतर, नवी मुंबई आंतरराष्ट्रीय विमानतळ (NMIA) येत्या २५ डिसेंबरपासून कार्यरत होत असून प्रारंभी देशांतर्गत उड्डाणांसाठी हा विमानतळ सुरू केला जाणार आहे.
इंडिगो आणि एअर इंडिया या दोन्ही कंपन्यांनी पहिल्या टप्प्यातील उड्डाणांची घोषणा केली आहे. इंडिगोकडून दिल्ली, बंगळुरू, हैदराबाद, अहमदाबाद, लखनऊ, जयपूर, नागपूर, उत्तर गोवा, कोचीन आणि मंगळुरू अशा १० प्रमुख शहरांसाठी विमानसेवा उपलब्ध होणार आहे.
तर एअर इंडिया २५ डिसेंबरपासून बंगळुरू आणि दिल्ली मार्गावर उड्डाणे सुरू करणार असून, १ जानेवारीपासून दोन्ही मार्गांवरील सेवा दिवसातून सुरू राहतील. सर्व सेवांसाठी ऑनलाइन आणि ऑफलाइन बुकिंग सुरू झाले आहे.
विमानतळ सुरू झाल्यानंतर मुंबई महानगर प्रदेशातून नवी मुंबईकडे होणारी वाहतूक मोठ्या प्रमाणात वाढण्याचा अंदाज व्यक्त करण्यात आला आहे. या पार्श्वभूमीवर नवी मुंबई महानगरपालिकेकडून ठाणे–बेलापूर मार्गाच्या व्यापक पुनर्विकासाची तयारी सुरु आहे.
अतिवाढलेल्या वाहतुकीचा ताण कमी करण्यासाठी महापालिकेने तीन महत्त्वाच्या ठिकाणी उड्डाणपूल उभारण्याचा प्रस्ताव सादर केला आहे.
यामध्ये रबाळे जंक्शन उड्डाणपूलासाठी १७१ कोटी रुपये, क्रिस्टल हाऊस–पावणे दरम्यानच्या उड्डाणपूलासाठी ११० कोटी रुपये, तर BASF परिसर ते महापे येथील हुंडई शोरूमपर्यंतच्या मोठ्या उड्डाणपूलासाठी तब्बल ३३८ कोटी रुपये खर्च अपेक्षित आहे.
याशिवाय ठाणे–बेलापूर मार्गाच्या संपूर्ण पुनर्बांधणीसाठी स्वतंत्ररीत्या २२७ कोटी रुपयांची तरतूद करण्यात आली आहे. दरम्यान, तुर्भे परिसरात वाहतूक कोंडी दूर करण्यासाठी रेल्वे स्थानकाजवळ एक स्वतंत्र उड्डाणपूल आधीच उभारला जात आहे.
हा परिसर कायमच वाहतुकीच्या समस्येने त्रस्त असल्याने नव्या पुलामुळे मोठा दिलासा मिळेल, अशी अपेक्षा आहे. एनएमएमसीच्या शहर अभियांत्रिकी विभागातील अधिकाऱ्यांच्या मते, विमानतळ पूर्ण क्षमतेने कार्यान्वित झाल्यानंतर प्रवासी तसेच मालवाहतूक मोठ्या प्रमाणात वाढणार असल्याने ठाणे–बेलापूर मार्गाचे आधुनिकीकरण अत्यावश्यक ठरणार आहे.
येत्या काही वर्षांत या मार्गाचे विस्तारीकरण, मजबुतीकरण आणि सुसज्जीकरण पूर्ण होणार असून तो अधिक सुरक्षित आणि वेगवान वाहतुकीसाठी सक्षम होईल. नवी मुंबई विमानतळामुळे परिसराच्या विकासाला नवे गतीमान मिळण्याची शक्यता व्यक्त होत आहे.
