Cotton Farming : कापूस उत्पादक शेतकऱ्यांसाठी एक दिलासादायक बातमी समोर आली आहे. कापसाच्या भावात थोडीशी वाढ नमूद करण्यात आली आहे. गुरुवारी विदर्भातील अकोला जिल्ह्यात कापूस बाजारात तेजी दिसून आली. येथे आवक आणि रेट दोन्हीही वाढलेत आणि यामुळे शेतकऱ्यांना मोठा दिलासा मिळाला आहे.
कापसाला पांढरे सोने म्हणून ओळखले जाते. या पिकाची राज्यातील मराठवाडा विदर्भ तसेच उत्तर महाराष्ट्रातील काही जिल्ह्यांमध्ये मोठ्या प्रमाणात लागवड होते. मात्र गेल्या काही काळापासून हे पीक शेतकऱ्यांना परवडत नाहीये.
गेले दोन वर्ष कापूस हे पीक शेतकऱ्यांसाठी तोट्याचे ठरले आहे. मात्र यंदा कापसाला समाधानकारक भाव मिळणार अशी शेतकऱ्यांना अपेक्षा असून गुरुवारी अकोला येथील सीसीआय खरेदी केंद्रावर कापसाला चांगला सकारात्मक दर मिळाला.
यामुळे शेतकऱ्यांमध्ये अगदीच समाधानाचे वातावरण पाहायला मिळाले. अकोला सीसीआयच्या खरेदी केंद्रावर गुरुवारी 2190 क्विंटल कापूस आवक झाली. या ठिकाणी गुरुवारी कापसाला कमाल 8 हजार 60 रुपये प्रति क्विंटल भाव मिळाला.
तसेच किमान 7 हजार 738 आणि सरासरी 7 हजार 899 रुपये प्रति क्विंटल असा भाव मिळाला. गुरुवारी कापूस बाजार भावात फार मोठी चढ उतार पाहायला मिळाली नाही.
त्यामुळे येत्या काळात कापसाचे दर आणखी वाढू शकतात अशी अपेक्षा आहे. बाजार अभ्यासकांनी दिलेल्या माहितीनुसार सध्या राज्यात सगळीकडे थंडीचा जोर वाढतोय आणि यामुळे कापूस वेचणीला आणखी वेग येणार आहे.
परिणामी येत्या काळात बाजारांमध्ये कापसाची आवक आणखी वाढू शकते. दरम्यान, कापसाची आवक येत्या काळात वाढली तरी देखील बाजारातील मागणी पण चांगली राहणार आहे.
यामुळे यापुढे पण बाजारात किमत अशीच स्थिर राहण्याची शक्यता व्यक्त केली जात आहे. सीसीआयची खरेदी सुरू असल्याने याचा पण बाजार भावाला नक्कीच मोठा आधार मिळणार आहे. शेतकऱ्यांना हमीभावासोबतच बाजारातील स्पर्धात्मक दराचा फायदा होतोय.
शिवाय शेतकरी बांधव सुद्धा गरजेनुसार आणि भाव पाहून माल विक्रीसाठी आणत असल्याने बाजारात अनियंत्रित आवक टळत असून, दर पुढील काळात सुद्धा टिकून राहणार असे म्हटले जात आहे. मात्र असे असले तरी कापूस बाजार भावावर वेगवेगळ्या घटकांचा प्रभाव पडत असतो.
जागतिक बाजाराचाही कापूस दरावर प्रभाव पाहायला मिळतो. यामुळे आता येत्या काळात कापसाची आवक कशी राहणार, जागतिक स्थिती कशी राहणार यावरच कापसाचे दर अवलंबून असतील.
