Pune Metro News : पुणेकरांसाठी एक महत्त्वाचे अपडेट समोर येत आहे हे अपडेट आहे पुणे मेट्रोबाबत. पुणे शहरातील वाहतूक कोंडीचा प्रश्न निकाली निघावा यासाठी शासनाच्या आणि प्रशासनाच्या माध्यमातून वेगवेगळ्या उपाययोजना राबवल्या जात आहेत.
पुणे मेट्रो देखील वाहतूक कोंडी कमी करण्यासाठी सुरू करण्यात आली असून मेट्रोला पुणेकरांच्या माध्यमातून चांगला प्रतिसाद सुद्धा मिळत आहे. आजच्या घडीला पुण्यात दोन मेट्रो मार्ग सुरू आहेत.
पिंपरी चिंचवड महापालिका ते स्वारगेट आणि वनाज ते रामवाडी या मार्गांवर सध्या मेट्रो सुरू आहे. महत्वाचे बाब म्हणजे पिंपरी चिंचवड महापालिका ते स्वारगेट या मार्गाचा विस्तारही करण्यात येणार आहे.
हा मार्ग थेट कात्रज पर्यंत नेला जाणार आहे. म्हणजेच स्वारगेट ते कात्रज असा नवा मेट्रो मार्ग विकसित होणार असून याच प्रकल्पाबाबत आता एक महत्त्वाची माहिती समोर आली आहे. स्वारगेट ते कात्रज भूमिगत मेट्रो मार्गिकेच्या प्रत्यक्ष कामाला लवकरच सुरूवात होणार आहे.
महाराष्ट्र मेट्रो रेल्वे कॉर्पोरेशन लिमिटेड (महामेट्रो) यांनी या प्रकल्पासाठी आयटीडी सिमेंटेशन इंडिया लिमिटेड या कंपनीची निवड केली असून, तिला अधिकृतपणे वर्क ऑर्डर जारी करण्यात आली आहे.
मागील दीड वर्षांपासून प्रलंबित असलेल्या या प्रकल्पाला यामुळे गति मिळणार आहे. पुण्यात मध्यवर्ती शहरातून दक्षिणेकडील भागाकडे जाणाऱ्या मार्गावर वाढत्या वाहतूक कोंडी आणि प्रदूषणाच्या समस्येचे समाधान म्हणून स्वारगेट–कात्रज हा मेट्रो मार्ग प्रस्तावित करण्यात आला.
५.४६ किलोमीटर लांबीच्या या महत्वाच्या मेट्रो मार्गिकेचे भूमिपूजन २९ सप्टेंबर २०२४ रोजी पंतप्रधान नरेंद्र मोदी यांच्या हस्ते पार पडले होते. तथापि, तांत्रिक कारणे, मार्गातील अडथळे आणि स्थानिकांच्या मागण्या यांमुळे कामाची प्रक्रिया पुढे ढकलली जात होती.
स्थानिक नागरिक आणि लोकप्रतिनिधींच्या सूचनांनुसार या मार्गिकेत बिबवेवाडी आणि बालाजीनगर ही दोन अतिरिक्त स्थानके समाविष्ट करण्यात आली आहेत. आता निवडणूक आचारसंहितेच्या पार्श्वभूमीवर राज्य निवडणूक आयोगाची आवश्यक परवानगी मिळाल्याने प्रकल्पाच्या कामास अधिकृत हिरवा कंदील मिळाला आहे.
कामाच्या अंमलबजावणीसाठी महामेट्रो आणि कंत्राटदार कंपनी यांच्यातील करारानुसार प्रकल्प २०२९ पर्यंत पूर्ण करण्याचे लक्ष्य ठेवण्यात आले आहे, अशी माहिती महामेट्रोचे जनसंपर्क संचालक चंद्रशेखर तांबवेकर यांनी दिली.
या प्रकल्पासाठी केंद्र आणि राज्य सरकारकडून आधीच मंजुरी मिळाल्यामुळे येत्या काही आठवड्यांत भूमिगत बोगदा खोदकाम आणि स्थानक बांधणीचे प्राथमिक टप्पे सुरू होण्याची शक्यता आहे.
कात्रज, बिबवेवाडी, धनकवडी, सहकारनगर, गुलटेकडी, मार्केटयार्ड तसेच पुण्याबाहेरून स्वारगेटकडे येणाऱ्या कोल्हापूर, सातारा, सांगली येथील प्रवाशांसाठी हा मार्ग अत्यंत सोयीस्कर ठरणार आहे. मार्गिकेवरील एकूण पाच स्थानकांमध्ये मार्केटयार्ड, पद्मावती, बिबवेवाडी, बालाजीनगर आणि कात्रज यांचा समावेश आहे.
प्रकल्पाचा एकूण खर्च ३,७८० कोटी रुपये असून, हा मार्ग कार्यान्वित झाल्यानंतर शहरातील वाहतूक ताण मोठ्या प्रमाणात कमी होईल. तसेच इतर मेट्रो मार्गांशी जोडणी झाल्यामुळे पिंपरी, शिवाजीनगर आणि रामवाडीपर्यंतचा प्रवासही अधिक वेगवान होणार आहे.
