Multibagger Stock : शेअर बाजारात सध्या अस्थिरतेचं वातावरण असून अनेक शेअर्समध्ये घसरण दिसून येत आहे. गुंतवणूकदारांमध्ये चिंता असतानाच एका स्मॉल-कॅप शेअरनं मात्र बाजाराच्या प्रवाहाविरुद्ध जात आपली वेगळी ओळख निर्माण केली आहे. आपण बोलत आहोत मर्क्युरी ईव्ही-टेक (Mercury EV-Tech) या कंपनीबद्दल, ज्यानं कमकुवत बाजारातही दमदार तेजी दाखवत गुंतवणूकदारांसाठी आशेचा किरण निर्माण केला आहे.
गेल्या शुक्रवारी बाजार सुस्त असतानाही मर्क्युरी ईव्ही-टेकच्या शेअर्समध्ये जोरदार खरेदी पाहायला मिळाली. वाढत्या ट्रेडिंग व्हॉल्युममुळे या तेजीला बळ मिळालं. व्यवहारादरम्यान हा शेअर सुमारे १५.५ टक्क्यांनी वाढून ३६.५१ रुपयांवर पोहोचला.
मात्र, ही तेजी असूनही हा शेअर अजूनही आपल्या ५२ आठवड्यांच्या ८७ रुपयांच्या उच्चांकापासून सुमारे ५८ टक्के खाली व्यवहार करत आहे. जानेवारी २०२५ मध्ये गाठलेला हा उच्चांक या शेअरमधील मोठी अस्थिरता स्पष्ट करतो.
गेल्या काही महिन्यांत मर्क्युरी ईव्ही-टेकच्या शेअरमध्ये मोठे चढ-उतार पाहायला मिळाले आहेत. अलीकडेच हा शेअर २९.९५ रुपयांच्या ५२ आठवड्यांच्या नीचांकी पातळीवर पोहोचला होता.
गेल्या एका वर्षात शेअरमध्ये सुमारे ५८ टक्के, सहा महिन्यांत ३० टक्के, तीन महिन्यांत २१ टक्के आणि एका महिन्यात ८.५ टक्क्यांची घसरण नोंदवण्यात आली आहे. मात्र, अल्पकालीन दबाव असूनही दीर्घकालीन गुंतवणूकदारांसाठी हा शेअर अत्यंत फायदेशीर ठरलेला आहे.
दीर्घकालीन परताव्याच्या बाबतीत मर्क्युरी ईव्ही-टेक खरा मल्टीबॅगर ठरला आहे. गेल्या पाच वर्षांत या शेअरनं ५००० टक्क्यांहून अधिक परतावा दिला आहे. पाच वर्षांपूर्वी १ लाख रुपयांची गुंतवणूक आज सुमारे ५१ लाख रुपये, तर २ लाखांची गुंतवणूक १ कोटी रुपयांहून अधिक झाली असती.
कंपनीची आर्थिक स्थितीही भक्कम होताना दिसत आहे. चालू आर्थिक वर्षाच्या दुसऱ्या तिमाहीत कंपनीची निव्वळ विक्री ५१ टक्क्यांनी वाढून ३४.०१ कोटी रुपये, तर निव्वळ नफा ३५ टक्क्यांनी वाढून १.७२ कोटी रुपये झाला आहे. पहिल्या सहामाहीत विक्रीत १४२ टक्क्यांची, तर नफ्यात ४३ टक्क्यांची वाढ नोंदवण्यात आली आहे.
१९८६ मध्ये स्थापन झालेली मर्क्युरी ईव्ही-टेक कंपनी इलेक्ट्रिक मोबिलिटी आणि रिन्युएबल एनर्जी क्षेत्रात कार्यरत आहे. इलेक्ट्रिक स्कूटर, कार, बस तसेच विशेष ईव्ही उत्पादनांमध्ये कंपनीची उपस्थिती आहे. देशात आणि जागतिक पातळीवर ईव्ही क्षेत्राची वाढती मागणी पाहता, येणाऱ्या काळातही हा शेअर गुंतवणूकदारांच्या रडारवर राहण्याची शक्यता तज्ज्ञ व्यक्त करत आहेत.
