शेअर बाजारात मंगळवारी वक्रांगी लिमिटेडने लक्ष वेधून घेतले. ट्रेडिंगदरम्यान कंपनीचा शेअर जवळपास ८ टक्क्यांनी उसळत ₹७.०६ या पातळीवर पोहोचला. डिसेंबर तिमाहीतील दमदार आर्थिक निकालांमुळे गुंतवणूकदारांचा विश्वास वाढला असून कमी किमतीतील या शेअरकडे पुन्हा एकदा बाजाराचे लक्ष केंद्रीत झाले आहे. निव्वळ नफ्यात २०१% झेप, तीन महिन्यांतच मोठी कामगिरी ३१ डिसेंबर २०२५ रोजी संपलेल्या तिसऱ्या तिमाहीत (Q3FY26) वक्रांगी लिमिटेडचा निव्वळ नफा तब्बल २०१ टक्क्यांहून अधिक वाढला आहे.
या कालावधीत कंपनीने ₹३१५ लाखांचा नफा नोंदवला, तर मागील वर्षी याच तिमाहीत हा आकडा ₹१०४.६ लाख इतका होता. विशेष म्हणजे, आर्थिक वर्ष २६ च्या पहिल्या नऊ महिन्यांत एकूण नफा ₹९४९.८ लाखांवर पोहोचला असून, हा आकडा संपूर्ण FY25 मधील नफ्यालाही मागे टाकणारा आहे.
ऑपरेशनल आघाडीवरही मजबूत सुधारणा फक्त नफा नाही, तर ऑपरेशनल पातळीवरही कंपनीची कामगिरी भरीव ठरली आहे. EBITDA मध्ये वर्षभरात ४८.७% वाढ झाली असून मार्जिन ९.२% वरून थेट १५.४% पर्यंत झेपावले आहे. रोख नफा जवळपास ४७% वाढून ₹७७६.२ लाखांवर पोहोचला. कंपनी-अंतर्गत विक्री समायोजन आणि एटीएम मशीनच्या अंतर्गत पुरवठ्यामुळे एकूण उत्पन्नात १०.३% घट होऊन ₹६,१५७.६ लाख इतके झाले असले, तरी स्वतंत्र आधारावर महसूल ३.६% वाढला आहे.
यामुळे कंपनीच्या मुख्य व्यवसायात सातत्यपूर्ण प्रगती सुरू असल्याचे स्पष्ट होते. उच्च-मूल्याच्या सेवांकडे वळण, व्यवसाय धोरणात बदल वक्रांगी लिमिटेड सध्या कमी मार्जिन असलेल्या व्यवसायांपासून दूर जात उच्च-मूल्याच्या वित्तीय सेवांवर लक्ष केंद्रीत करत आहे. खाते उघडणे, कर्ज सुविधा, विमा, मुदत ठेवी, म्युच्युअल फंड तसेच एनपीए रिकव्हरीसारख्या सेवांचा कंपनी वेगाने विस्तार करत आहे.
देशभरातील ३२ राज्ये व केंद्रशासित प्रदेशांतील ६०९ जिल्ह्यांमध्ये कंपनीचे २३,०३४ वक्रांगी सेंटर कार्यरत आहेत. यापैकी सुमारे ८४% केंद्रे टियर ४, ५ आणि ६ भागात आहेत, ज्यामुळे ग्रामीण व निमशहरी भागात वित्तीय सेवा पोहोचवण्यात कंपनीची भूमिका महत्त्वाची ठरत आहे. या तिमाहीत प्लॅटफॉर्मवर २२ दशलक्ष व्यवहार झाले असून त्यांची एकूण किंमत ₹१३,४३३ कोटी इतकी आहे.
उपकंपनीचीही दमदार कामगिरी कंपनीची उपकंपनी व्हर्टेक्स इंजिनिअरिंगनेही आर्थिक वर्ष २६ च्या पहिल्या नऊ महिन्यांत उल्लेखनीय प्रगती केली आहे. महसूल १७% वाढला असून एटीएम शिपमेंट २३% वाढून १,४६२ युनिट्सपर्यंत पोहोचली आहेत. EBITDA जवळपास साडेचार पट वाढला असून उपकंपनीने निव्वळ नफाही नोंदवला आहे.
कर्जमुक्त स्थिती आणि डिजिटल विस्तारामुळे भविष्यासाठी आशावाद वक्रांगी लिमिटेड आणि तिच्या सर्व उपकंपन्या सध्या पूर्णपणे कर्जमुक्त असून मजबूत बॅलन्स शीट राखत आहेत. याशिवाय, बँकिंग, विमा, ई-कॉमर्स आणि लॉजिस्टिक्स सेवा ‘भारतईजी’ मोबाइल सुपर अॅपद्वारे डिजिटल प्लॅटफॉर्मवर उपलब्ध करून दिल्या जात आहेत. व्यवस्थापनाच्या मते, कंपनी ही सकारात्मक गती कायम ठेवण्यास सक्षम असून दीर्घकालीन गुंतवणूकदारांसाठी टिकाऊ मूल्य निर्माण करण्याचा आत्मविश्वास व्यक्त करण्यात आला आहे. कमी किमतीत असलेला हा शेअर पुढील काळात किती उंची गाठतो, याकडे आता बाजाराचे बारकाईने लक्ष लागले आहे.
