भारतीय दुचाकी बाजारात यामाहाने मोठी झेप घेतली असून, नुकत्याच लाँच झालेल्या XSR मोटरसायकलने अवघ्या दोन महिन्यांत कंपनीचा सर्वाधिक विक्री होणारा मॉडेल होण्याचा मान पटकावला आहे. नोव्हेंबर २०२५ मध्ये सादर झालेल्या या बाईकने थेट ग्राहकांच्या पसंतीचा कळस गाठत, डिसेंबरमध्येच विक्रीच्या शिखरावर झेप घेतली. सुमारे ₹१.५० लाख एक्स-शोरूम किंमत असूनही XSR ला बाजारातून प्रचंड प्रतिसाद मिळाला आहे. डिसेंबर २०२५ मध्ये तब्बल १४,९५१ युनिट्सची विक्री करत या मॉडेलने यामाहाच्या एकूण विक्रीपैकी २७.२३% बाजार हिस्सा आपल्या नावावर केला.
डिसेंबरमध्ये यामाहाला ४९% वार्षिक वाढ – एकूण ५४,९१४ दुचाकींची विक्री डिसेंबर २०२५ मध्ये यामाहाने एकूण ५४,९१४ युनिट्स विक्री केली. मागील वर्षी याच कालावधीत ही संख्या ३६,७८० होती. म्हणजेच कंपनीने १८,१३४ अतिरिक्त वाहनांची विक्री करत तब्बल ४९.३% वार्षिक वाढ नोंदवली आहे. ही वाढ भारतीय बाजारातील यामाहाची मजबूत होत चाललेली पकड स्पष्ट करते.
RayZR आणि FZ चीही भक्कम कामगिरी XSR नंतर दुसऱ्या क्रमांकावर राहिली RayZR स्कूटर, जिने डिसेंबरमध्ये १४,१५३ युनिट्स विक्री करत २५.७७% बाजार हिस्सा मिळवला. मागील वर्षाच्या तुलनेत RayZR ची विक्री १७.९२% वाढली, म्हणजेच २,१५१ युनिट्सची अतिरिक्त भर पडली.
तिसऱ्या स्थानावर असलेल्या FZ मोटरसायकलने १०,२९१ युनिट्स विक्री केली. डिसेंबर २०२४ मधील ८,५५८ युनिट्सच्या तुलनेत ही २०.२५% वाढ असून, FZ चा बाजार हिस्सा १८.७४% इतका राहिला. R15 नेही घेतली झेप; काही मॉडेल्सची मात्र घसरण स्पोर्ट्स सेगमेंटमधील लोकप्रिय R15 ने ५,४५३ युनिट्स विक्री करत २७.७३% वाढ नोंदवली. मागील वर्षी ही संख्या ४,२६९ होती. R15 चा बाजार हिस्सा ९.९३% इतका ठरला.
मात्र दुसरीकडे Fascino, MT15 आणि Aerox या मॉडेल्सच्या विक्रीत घट दिसून आली. Fascino ची विक्री ८४५ युनिट्सनी कमी झाली, MT15 मध्ये ८२१ युनिट्सची घसरण झाली, तर Aerox ने २१७ युनिट्स कमी विक्री नोंदवली. प्रीमियम सेगमेंटमधील R3/MT03 ची विक्री नगण्यच राहिली. XSR मुळे बदलले यामाहाचे चित्र एकूण आकडेवारी पाहता, XSR हे यामाहासाठी टर्निंग पॉइंट ठरले आहे. रेट्रो-मॉडर्न डिझाइन, दमदार इंजिन आणि प्रीमियम फील यामुळे ग्राहकांचा कल या बाईककडे झपाट्याने वाढत आहे. अवघ्या दोन महिन्यांत नंबर वन बनणे हेच XSR च्या यशाचे मोठे उदाहरण मानले जात आहे.
