E-Shivai Bus : प्रवाशांच्या सोयीसाठी महाराष्ट्र राज्य मार्ग परिवहन महामंडळाने (MSRTC) एक महत्त्वपूर्ण निर्णय घेत पुणे स्टेशन ते बोरीवली (सायन मार्गे) धावणारी ई-शिवाई वातानुकूलित बस सेवा अधिकृतपणे सुरू केली आहे.
या नव्या सेवेचा लाभ पुणे, चिंचवड आणि मुंबईदरम्यान दररोज कामानिमित्त प्रवास करणाऱ्या हजारो प्रवाशांना होणार आहे. वाढती वाहतूक कोंडी, रेल्वेतील गर्दी आणि खासगी वाहनांचा खर्च लक्षात घेता ही सेवा प्रवाशांसाठी मोठा दिलासा ठरणार आहे.
एमएसआरटीसीकडून सुरू करण्यात आलेली ही ई-शिवाई बस सेवा शिवाजीनगर आगारातून धावणार आहे. ही बस पुणे स्टेशन, चिंचवड आणि सायन मार्गे बोरीवली येथे पोहोचणार असून, प्रवाशांना शहरातील गर्दी टाळत सुरक्षित, वेळेवर आणि आरामदायी प्रवासाचा अनुभव देण्याचा उद्देश आहे.
ई-शिवाई बस पूर्णपणे वातानुकूलित असून, आधुनिक आसन व्यवस्था, आरामदायी सीट्स आणि सुरक्षिततेच्या दृष्टीने आवश्यक सुविधा उपलब्ध आहेत.
पुणे–बोरीवली मार्गावर दररोज ठराविक वेळेत बस फेऱ्या असणार आहेत. सकाळी 6.00, 7.00, 8.00 आणि 9.00 वाजता, दुपारी 1.00, 2.00 आणि 3.00 वाजता तसेच सायंकाळी 4.00 वाजता या बस धावणार आहेत. त्यामुळे कार्यालयीन वेळा, व्यवसायिक प्रवास तसेच वैयक्तिक कारणांसाठी जाणाऱ्या प्रवाशांना वेळेचे नियोजन करणे अधिक सोपे होणार आहे.
तिकीट आरक्षणाच्या दृष्टीनेही एमएसआरटीसीने प्रवाशांना अनेक पर्याय उपलब्ध करून दिले आहेत. पुणे स्टेशन बसस्थानक, वल्लभनगर, चिंचवड स्टेशन आणि निगडी येथून थेट तिकीट आरक्षण करता येणार आहे. तसेच MSRTC चे अधिकृत मोबाईल ॲप आणि संकेतस्थळावरून ऑनलाइन तिकीट आरक्षित करण्याची सुविधाही उपलब्ध आहे.
ई-शिवाई वातानुकूलित बस सेवा ही सुरक्षित, आरामदायी आणि वेळेची बचत करणारी असल्याचे एमएसआरटीसीने स्पष्ट केले आहे. जास्तीत जास्त प्रवाशांनी या सेवेचा लाभ घ्यावा, असे आवाहन विभाग नियंत्रक अरुण सिया यांनी केले आहे. पुणे आणि मुंबईदरम्यान प्रवास करणाऱ्या प्रवाशांसाठी ही सेवा एक विश्वासार्ह आणि सोयीस्कर पर्याय ठरणार असल्याचे चित्र आहे.
