PPF News : आपल्या पाल्याचे भविष्य सुरक्षित करण्यासाठी अनेक पालक पब्लिक प्रॉव्हिडंट फंड (PPF) या सरकारी बचत योजनेला पसंती देतात. सुरक्षित गुंतवणूक, निश्चित परतावा आणि कर सवलत यामुळे ही योजना दीर्घकाळापासून लोकप्रिय आहे.
मात्र, मुलांच्या नावावर PPF खाते उघडताना काही मूलभूत नियमांची माहिती नसल्याने अनेक पालक अनवधानाने मोठ्या आर्थिक नुकसानीला सामोरे जात आहेत. विशेषतः गुंतवणुकीच्या मर्यादेबाबत असलेल्या गैरसमजामुळे अनेकांचे व्याजाचे उत्पन्न बुडत असल्याचे समोर आले आहे.
पालकांसाठी सर्वात मोठा ‘PPF ट्रॅप’
PPF च्या नियमानुसार, एका आर्थिक वर्षात कमाल १.५ लाख रुपये गुंतवता येतात. महत्त्वाची बाब म्हणजे ही मर्यादा पालकाचे स्वतःचे खाते आणि अल्पवयीन मुलाचे खाते मिळून असते.
उदाहरणार्थ, जर एखाद्या पालकाने स्वतःच्या PPF खात्यात १.५ लाख रुपये भरले आणि त्यानंतर मुलाच्या खात्यात आणखी १ लाख रुपये जमा केले, तर त्या जादा १ लाख रुपयांवर एक रुपयाही व्याज मिळणार नाही.
ही अतिरिक्त रक्कम मूळ रकमेत मोजली जात असली तरी त्यावर कोणतेही व्याज मिळत नाही. १५ वर्षांच्या दीर्घ कालावधीत चक्रवाढ व्याजाचा फायदा न मिळाल्याने ही चूक लाखोंच्या नुकसानीत बदलू शकते.
पालकांकडून होणाऱ्या ३ प्रमुख चुका
वेगवेगळ्या मर्यादा समजणे : अनेक पालकांना वाटते की मुलाच्या खात्यासाठी स्वतंत्र १.५ लाखांची मर्यादा असते. प्रत्यक्षात, मूल १८ वर्षांचे होईपर्यंत पालक आणि मुलाची एकत्रित मर्यादा १.५ लाखच असते.
दोन खाती उघडणे : एका मुलाच्या नावावर संपूर्ण देशात फक्त एकच PPF खाते असू शकते. पोस्ट ऑफिस आणि बँक अशा दोन ठिकाणी खाती उघडल्यास ते नियमबाह्य ठरते आणि खाते गोठवले जाऊ शकते.
कर सवलतीचा चुकीचा दावा : आयकर कायद्याच्या कलम 80C अंतर्गत केवळ १.५ लाख रुपयांपर्यंतच कर सवलत मिळते. त्यापेक्षा जास्त रकमेवर सवलत मागितल्यास आयकर विभागाकडून नोटीस येण्याची शक्यता असते.
१८ वर्षांनंतर बदलते चित्र
मूल सज्ञान झाल्यानंतर त्याचे PPF खाते पूर्णपणे त्याच्या नियंत्रणात येते. त्यानंतर मुलाला स्वतंत्रपणे १.५ लाख रुपयांची मर्यादा लागू होते. अशा परिस्थितीत पालक आणि सज्ञान मूल मिळून ३ लाख रुपयांपर्यंत गुंतवणूक करून पूर्ण व्याजाचा लाभ घेऊ शकतात.
गुंतवणूकदारांसाठी ‘स्मार्ट’ टिप्स
एप्रिलमध्येच गुंतवणूक करा : ५ एप्रिलपूर्वी रक्कम भरल्यास संपूर्ण वर्षाचे व्याज मिळते.
एकूण रक्कम तपासा : स्वतःच्या आणि मुलाच्या खात्यातील मिळून गुंतवणूक १.५ लाखांच्या मर्यादेत ठेवा.
व्याजदराचा फायदा घ्या : सध्या PPF वर वार्षिक ७.१% व्याजदर मिळत असून तो पूर्णपणे करमुक्त आहे.
योग्य माहिती आणि नियोजन केल्यास PPF ही योजना पाल्याच्या भविष्याला मजबूत आर्थिक आधार देऊ शकते.
