Farmer News : राज्यासह देशातील शेतकऱ्यांसाठी दिलासादायक आणि महत्त्वाची बातमी आहे. केंद्रीय कृषी आणि शेतकरी कल्याण मंत्री शिवराज सिंह चौहान यांनी शेतकऱ्यांना कायदेशीर संरक्षण देण्यासाठी लवकरच संसदेत नवीन कृषी कायदे सादर केले जाणार असल्याची मोठी घोषणा केली आहे.
छत्तीसगडच्या दुर्ग जिल्ह्यातील शेतकऱ्यांशी संवाद साधताना त्यांनी ही माहिती दिली. शेतकऱ्यांच्या कष्टाशी, पिकांशी आणि त्यांच्या भविष्यासोबत खेळ करणाऱ्यांना यापुढे माफी दिली जाणार नाही, असा स्पष्ट इशाराही त्यांनी दिला.
शिवराज सिंह चौहान यांनी सांगितले की, बनावट बियाणे, खते आणि कीटकनाशकांच्या विक्रीमुळे शेतकऱ्यांचे मोठे आर्थिक नुकसान होत आहे. अशा प्रकारची फसवणूक हा केवळ गुन्हा नसून शेतकऱ्यांच्या उपजीविकेवरचा थेट हल्ला आहे.
त्यामुळे अशा समाजकंटकांवर निर्णायक, कठोर आणि दंडात्मक कारवाई करण्यासाठी नवीन कायद्यांमध्ये विशेष तरतुदी केल्या जाणार आहेत. शेतकऱ्यांची फसवणूक करणाऱ्यांवर आर्थिक दंडासह कडक शिक्षा देण्याची तरतूद या कायद्यांमध्ये असण्याची शक्यता आहे.
पंतप्रधान नरेंद्र मोदी यांच्या नेतृत्वाखाली केंद्र सरकारचे सर्वोच्च प्राधान्य शेतकरी आणि त्यांचा सर्वांगीण विकास असल्याचे चौहान यांनी यावेळी अधोरेखित केले.
शेतकऱ्यांना मध्यस्थ, दलाल आणि फसव्या विक्रेत्यांपासून संरक्षण देणे हे सरकारचे मुख्य उद्दिष्ट असल्याचेही त्यांनी स्पष्ट केले. शेतकऱ्यांचे हक्क सुरक्षित राहावेत आणि त्यांना न्याय मिळावा यासाठी कायदेशीर चौकट अधिक मजबूत केली जाणार आहे.
याशिवाय, शिवराज सिंह चौहान यांनी शेतकऱ्यांना पारंपारिक शेतीसोबत फळशेती, भाजीपाला आणि विविध पिकांकडे वळण्याचे आवाहन केले. फळझाडे आणि बहुविध पिकांची लागवड केल्यास शेतकऱ्यांचे उत्पन्न वाढू शकते, असे त्यांनी सांगितले.
तसेच प्रधानमंत्री किसान सन्मान निधी योजनेचा उल्लेख करत, या योजनेद्वारे सरकार थेट लहान आणि अल्पभूधारक शेतकऱ्यांच्या खात्यात आर्थिक मदत जमा करत असल्याची माहितीही त्यांनी दिली.
एकूणच, प्रस्तावित नवीन कृषी कायद्यांमुळे शेतकऱ्यांना मोठे कायदेशीर संरक्षण मिळणार असून, बनावट कृषी निविष्ठांमुळे होणाऱ्या फसवणुकीला आळा बसण्याची अपेक्षा व्यक्त केली जात आहे.
