Gold Rate : १ फेब्रुवारी हा देशासाठी अत्यंत महत्त्वाचा दिवस ठरला आहे. आज केंद्रीय अर्थसंकल्प २०२६ सादर होणार असतानाच सकाळी वायदा बाजार उघडताच सोन्या-चांदीच्या किमतींमध्ये मोठी घसरण पाहायला मिळाली. या अचानक झालेल्या घसरणीमुळे मौल्यवान धातूंच्या बाजारात खळबळ उडाली असून, सामान्य ग्राहकांना मात्र याचा तात्पुरता दिलासा मिळाल्याचे चित्र आहे.
एमसीएक्सवर सकाळी व्यवहार सुरू होताच चांदीच्या किमतीत प्रचंड घसरण झाली. अवघ्या काही मिनिटांतच चांदीचा दर प्रति किलो २६ हजार रुपयांपेक्षा अधिक घसरला आणि त्यामुळे चांदीला लोअर सर्किट लागले.
सध्या एमसीएक्सवर १ किलो चांदीचा भाव सुमारे २,६५,६५२ रुपयांवर व्यवहार करत आहे. याआधीच्या सत्रात चांदीचा दर २,९१,९२२ रुपयांवर बंद झाला होता. दिवसभरात चांदीने मोठा उच्चांक आणि नीचांकही पाहिला होता, मात्र आजची घसरण सर्वाधिक लक्षवेधी ठरली.
चांदीप्रमाणेच सोन्याच्याही किमतीत मोठी घसरण नोंदवण्यात आली. वायदा बाजारात १० ग्रॅम सोन्याच्या दरात सुमारे १३ हजार रुपयांची घसरण झाली. सकाळी ९.३० च्या सुमारास सोन्यालाही लोअर सर्किट लागले.
एमसीएक्सवर १० ग्रॅम सोन्याचा दर काही वेळातच १,३८,६३८ रुपयांपर्यंत घसरला, तर ९.४१ वाजता तो १,३६,१८५ रुपयांवर व्यवहार करत होता. मागील सत्रात सोन्याचा दर १,४९,०७५ रुपयांवर बंद झाला होता.
दरम्यान, प्रत्यक्ष बाजारातही सोन्याच्या दरात घट दिसून येत आहे. बुलियन बाजारानुसार मुंबईत आज सकाळी १०.३० वाजता २४ कॅरेट सोन्याचा दर १० ग्रॅमसाठी १,४६,४०० रुपये आहे. २२ कॅरेट सोन्याचा दर १,३४,२०० रुपये, तर १८ कॅरेट सोन्याचा दर १,०९,८०० रुपये नोंदवण्यात आला आहे.
अर्थसंकल्पापूर्वी गुंतवणूकदारांची सावध भूमिका, जागतिक बाजारातील संकेत आणि नफावसुलीमुळे ही घसरण झाल्याचे तज्ज्ञांचे मत आहे. आगामी काळात अर्थसंकल्पातील घोषणांनंतर सोन्या-चांदीच्या किमतींमध्ये पुन्हा चढ-उतार पाहायला मिळण्याची शक्यता वर्तवली जात आहे.
