Railway News : पश्चिम महाराष्ट्र आणि कोकणला थेट जोडणारा बहुप्रतिक्षित कोल्हापूर-वैभववाडी रेल्वे मार्ग अखेर प्रत्यक्षात उतरणार असल्याने संपूर्ण राज्यात आनंदाचे वातावरण आहे. तब्बल चार दशकांपासून प्रलंबित असलेल्या या ऐतिहासिक प्रकल्पाला केंद्र सरकारच्या भरीव निधीमुळे नवा वेग मिळाला असून,
लवकरच प्रत्यक्ष कामाला सुरुवात होणार आहे. सह्याद्रीच्या डोंगररांगांमधून जाणारा हा मार्ग तांत्रिकदृष्ट्या अत्यंत आव्हानात्मक असला तरी विकासाच्या दृष्टीने तो मैलाचा दगड ठरणार आहे.
केंद्रीय अर्थसंकल्पात महाराष्ट्रासाठी मंजूर करण्यात आलेल्या ३० हजार कोटी रुपयांपैकी ३,४११ कोटी रुपये थेट कोल्हापूर-वैभववाडी रेल्वे मार्गासाठी देण्यात आले आहेत. एकूण ६,३०० कोटी रुपये खर्चाचा हा प्रकल्प केंद्र आणि राज्य सरकार संयुक्तपणे राबवणार असून, दोन्ही सरकारांचा प्रत्येकी ५० टक्के वाटा असेल.
विशेष म्हणजे भूसंपादनासाठी लागणारे सुमारे १,२०० कोटी रुपये देण्याची तयारी राज्य सरकारने दर्शवली असल्यामुळे जमिनीच्या प्रक्रियेला गती मिळणार आहे.
या रेल्वे मार्गाची एकूण लांबी १०७.६५ किलोमीटर इतकी आहे. सह्याद्रीच्या कडेकपारीतून मार्ग जात असल्याने यात २७ बोगदे प्रस्तावित असून, त्यांची एकूण लांबी तब्बल २८ किलोमीटर आहे.
यातील सर्वात मोठा बोगदा ३.९६ किलोमीटर लांबीचा असेल. याशिवाय ५५ मोठे पूल आणि ५५ उड्डाणपूल उभारण्यात येणार असून, हा मार्ग अभियांत्रिकी कौशल्याचा उत्तम नमुना ठरेल.
या प्रकल्पांतर्गत एकूण १० नवीन रेल्वे स्थानके उभारली जाणार आहेत. त्यामुळे कोल्हापूर जिल्ह्यातील करवीर, पन्हाळा आणि गगनबावडा हे तालुके थेट कोकणातील वैभववाडीशी जोडले जाणार आहेत. यासाठी सुमारे ६३८.६ हेक्टर जमीन संपादित केली जाणार आहे.
या मार्गामुळे कोल्हापूरची महालक्ष्मी, ऐतिहासिक पन्हाळा आणि कोकणातील समुद्रकिनारे रेल्वेने काही तासांत गाठता येणार आहेत. परिणामी पर्यटनाला मोठी चालना मिळेल.
तसेच कोकणातील आंबा-काजू आणि पश्चिम महाराष्ट्रातील साखर व दूध उद्योगाला नवी बाजारपेठ उपलब्ध होणार आहे. ५५ महिन्यांत हा प्रकल्प पूर्ण करण्याचे उद्दिष्ट ठेवण्यात आले असून, हा रेल्वे मार्ग पश्चिम महाराष्ट्र-कोकण विकासाचा नवा अध्याय ठरणार आहे.
