Pune News : पुणे-मुंबई दरम्यान रोज प्रवास करणाऱ्या हजारो प्रवाशांसाठी एक दिलासादायक बातमी समोर आली आहे. पुण्यातील आयटी हब असलेल्या हिंजवडीहून थेट मुंबईसाठी एसटी बससेवा सुरू करण्याचा प्रस्ताव राज्य परिवहन महामंडळाकडे विचाराधीन आहे.
मेट्रो लाइन तीन (हिंजवडी–शिवाजीनगर) येत्या मार्चअखेर सुरू होण्याची शक्यता असल्याने, या प्रस्तावाला अधिक बळ मिळाले आहे. हा निर्णय प्रत्यक्षात आल्यास पुण्यातील वाढती वाहतूक कोंडी कमी होण्यास मोठी मदत होणार आहे.
सध्या पुणे-मुंबई दरम्यान धावणाऱ्या बहुतांश एसटी बसेस स्वारगेट किंवा पुणे स्टेशन येथून सुटतात. मात्र पुणे शहरात प्रवेश केल्यानंतर वाकड चौकापासून स्वारगेटपर्यंत पोहोचण्यासाठी अनेकदा दीड ते दोन तासांचा कालावधी जातो.
एक्स्प्रेस-वे मोकळा असतानाही शहरातील वाहतूक कोंडीमुळे ई-शिवनेरी, ई-शिवाईसारख्या प्रीमियम बसेसही अडकतात. यामुळे प्रवाशांचा वेळ, पैसा आणि मानसिक ताण वाढतो.
ही अडचण लक्षात घेऊन विविध प्रवासी संघटनांनी हिंजवडीहून थेट मुंबईसाठी एसटी बसफेऱ्या सुरू करण्याची मागणी केली होती. त्यानुसार राज्य परिवहन महामंडळाच्या पुणे विभागाने याबाबत सविस्तर प्रस्ताव तयार करून वरिष्ठ पातळीवर पाठवला आहे.
हिंजवडी हे आयटी कंपन्यांचे प्रमुख केंद्र असून, दररोज हजारो कर्मचारी, उद्योजक आणि प्रवासी येथे ये-जा करतात. येथे स्वतंत्र एसटी स्थानक सुरू झाल्यास किमान एक तासाचा प्रवास वेळ वाचणार असल्याचे प्रशासनाचे मत आहे.
या योजनेला मेट्रो लाइन तीनचीही मोठी साथ मिळणार आहे. हिंजवडी ते शिवाजीनगर आणि जिल्हा न्यायालय अशी थेट मेट्रो कनेक्टिव्हिटी मिळाल्याने पिंपरी-चिंचवड, स्वारगेट, रामवाडी यांसह संपूर्ण पुणे शहर मेट्रोच्या जाळ्यात येईल. प्रवासी मेट्रोने थेट हिंजवडीतील एसटी स्थानकापर्यंत पोहोचून पुढील प्रवास मुंबईकडे सहज करू शकतील.
ही योजना केवळ वाहतूक सुधारणा नसून, पुणेकरांचा वेळ वाचवणारा, खर्च कमी करणारा आणि दैनंदिन ताण कमी करणारा महत्त्वाचा बदल ठरू शकते. आता हा प्रस्ताव प्रत्यक्षात कधी आणि कसा अमलात येतो, याकडे सर्वांचे लक्ष लागले आहे.
