Gold Rate : आज आठवड्याच्या सुरुवातीलाच कमोडिटी बाजारात सोन्या-चांदीच्या दरांनी जोरदार तेजी दाखवली. मल्टी कमोडिटी एक्स्चेंज (MCX) वर व्यवहार सुरू होताच दोन्ही मौल्यवान धातूंमध्ये मोठी वाढ नोंदवण्यात आली. विशेषतः चांदीच्या दरात ८,००० रुपयांहून अधिक वाढ झाली असून गुंतवणूकदारांचे लक्ष या तेजीने वेधून घेतले आहे.
५ मार्च रोजी डिलिव्हरी असणारी चांदी मागील सत्रात २,५२,५४८ रुपये प्रति किलोवर बंद झाली होती. मात्र आज बाजार उघडताच ती थेट २,५७,९३८ रुपयांवर उघडली.
सुरुवातीच्या व्यवहारात चांदीनं २,६०,८३८ रुपयांचा उच्चांक गाठला, तर २,५७,९३८ रुपयांची नीचांकी पातळी नोंदवली. सकाळी ९.३० वाजेपर्यंत चांदी ७,४५२ रुपयांच्या म्हणजेच २.९५ टक्क्यांच्या वाढीसह २,६०,००० रुपयांच्या आसपास व्यवहार करत होती. गेल्या सत्रात चांदीच्या दरात तीन टक्क्यांहून अधिक घसरण झाली होती, त्यामुळे आजची तेजी ही त्या घसरणीची भरपाई मानली जात आहे.
सोन्याच्या दरातही सकारात्मक हालचाल दिसून आली. २ एप्रिल रोजी डिलिव्हरी असणारं सोनं मागील सत्रात १,५६,८०३ रुपये प्रति १० ग्रॅमवर बंद झालं होतं. आज ते १,५८,४३६ रुपयांवर उघडलं.
सुरुवातीच्या व्यवहारात सोन्याचा दर १,५८,४३६ रुपयांच्या उच्चांकावर, तर १,५७,८०८ रुपयांच्या नीचांकी पातळीवर होता. सकाळी ९.३० वाजता सोनं १,१७४ रुपयांच्या म्हणजेच ०.७५ टक्क्यांच्या वाढीसह १,५७,९७७ रुपयांवर ट्रेड करत होतं.
आंतरराष्ट्रीय बाजारपेठेतही सोन्या-चांदीला आधार मिळाल्याचे दिसून येत आहे. अमेरिकेतील ट्रेझरी बाँड यील्डमध्ये झालेल्या घसरणीमुळे सुरक्षित गुंतवणुकीकडे कल वाढला आहे.
स्पॉट गोल्ड ०.३ टक्क्यांनी वाढून ५,०३८.७३ डॉलर प्रति औंसवर पोहोचलं आहे, तर यूएस गोल्ड फ्युचर ०.६ टक्क्यांच्या वाढीसह ५,०६०.६० डॉलरवर व्यवहार करत होते. त्याचप्रमाणे स्पॉट सिल्व्हरमध्ये १ टक्क्यांची वाढ होऊन ती ८१.४९ डॉलर प्रति औंसवर पोहोचली आहे.
तज्ञांच्या मते, जागतिक आर्थिक अनिश्चितता, डॉलरमधील चढ-उतार आणि व्याजदरांबाबतची अपेक्षा यामुळे आगामी काळात सोन्या-चांदीच्या दरात आणखी अस्थिरता पाहायला मिळू शकते. त्यामुळे गुंतवणूकदारांनी सावधगिरीने निर्णय घेण्याचा सल्ला दिला जात आहे.
