SIP Investment Tips : म्युच्युअल फंडातील एसआयपी (Systematic Investment Plan) ही सर्वसामान्य गुंतवणूकदारांसाठी संपत्ती निर्मितीची प्रभावी पद्धत मानली जाते.
मात्र, अनेक गुंतवणूकदार जलद परताव्याच्या अपेक्षेने किंवा बाजारातील चढ-उतारांच्या भीतीने मध्येच गुंतवणूक थांबवतात. अशा परिस्थितीत ‘7-5-3-1’ हा SIP नियम गुंतवणूकदारांना शिस्तबद्ध आणि दीर्घकालीन दृष्टीकोन ठेवण्यास मदत करणारा मार्गदर्शक ठरत आहे.
या नियमातील पहिला आकडा म्हणजे 7 वर्षांचा कालावधी. इक्विटी म्युच्युअल फंडांमध्ये किमान सात वर्षे सातत्याने गुंतवणूक टिकवून ठेवणे आवश्यक मानले जाते.
अल्पकालीन घसरणीमुळे तोटा दिसू शकतो; परंतु दीर्घकाळात चक्रवाढीचा प्रभाव स्पष्टपणे जाणवतो. ऐतिहासिक आकडेवारीनुसार, सात वर्षांपेक्षा जास्त कालावधीत गुंतवणूक केल्यास नुकसानाची शक्यता लक्षणीयरीत्या कमी होते आणि समाधानकारक परतावा मिळण्याची शक्यता वाढते.
दुसरा मुद्दा म्हणजे 5-फिंगर विविधीकरण धोरण. गुंतवणूक पाच वेगवेगळ्या प्रकारच्या कंपन्या किंवा फंडांमध्ये विभागणे गरजेचे आहे. यात दर्जेदार (Quality) स्टॉक्स, मूल्याधारित (Value) स्टॉक्स, GARP (Growth at Reasonable Price) स्टॉक्स, मिड व स्मॉल-कॅपसारखे उच्च जोखमीचे पण उच्च परताव्याची क्षमता असलेले स्टॉक्स, तसेच आंतरराष्ट्रीय किंवा ग्लोबल फंडांचा समावेश असावा. यामुळे एका क्षेत्रातील मंदीचा फटका कमी बसतो आणि जोखीम संतुलित राहते.
तिसरा भाग म्हणजे 3 मानसिक आव्हानांचा सामना. गुंतवणूक करताना काही काळ परतावा अपेक्षेपेक्षा कमी वाटू शकतो, कधी मुदत ठेवी आकर्षक वाटतात, तर कधी बाजार घसरल्याने भीती निर्माण होते. या तिन्ही टप्प्यांमध्ये संयम राखणे अत्यावश्यक आहे. बाजार दीर्घकालीन वाढीच्या दिशेनेच वाटचाल करतो, हा विश्वास ठेवणे गरजेचे आहे.
शेवटचा मुद्दा म्हणजे 1 सवय—दरवर्षी SIP रक्कम वाढवणे. पगार वाढल्यावर गुंतवणूकही वाढवणे, म्हणजेच ‘स्टेप-अप SIP’, चक्रवाढीचा फायदा अधिक वाढवते. लहान रकमेपासून सुरुवात करून सातत्याने वाढ केल्यास मोठा निधी तयार होऊ शकतो.
एकूणच, ‘7-5-3-1’ नियम हा जादूचा फॉर्म्युला नसून शिस्त, विविधीकरण आणि संयम यावर आधारित गुंतवणूक धोरण आहे. योग्य नियोजन आणि सातत्य ठेवल्यास SIP मधून दीर्घकालीन आर्थिक उद्दिष्टे सहज साध्य होऊ शकतात.
