शिर्डी : तहसील कार्यालयाने पूर्वी इतर व्यक्तीसाठी जारी केलेल्या उत्पन्नाच्या दाखल्यावरील बारकोडचा गैरवापर करून दुसऱ्या व्यक्तीसाठी बनावट दाखला तयार करण्यात आल्याच्या प्रकरणी पिंपळवाडी ग्रामपंचायतीचा ऑपरेटर प्रविण गोरक्षनाथ रोठे याच्याविरोधात शिर्डी पोलिस ठाण्यात गुन्हा दाखल करण्यात आला आहे. या प्रकारामुळे शासकीय यंत्रणेची फसवणूक झाल्याने महसूल विभागात खळबळ उडाली आहे.
याबाबत पोलीस सूत्रांनी सांगितलेली माहिती अशी, की या प्रकरणी महसूल सहाय्यक रवींद्र नारायण देशमुख (वय ५२, राहाता तहसील कार्यालय) यांनी पोलिस ठाण्यात तक्रार दाखल केली. त्यांच्या तक्रारीनुसार, दिनांक ११ जुलै रोजी सायंकाळी ४ वाजता ज्ञानदेव कंस वाकचौरे (वय २३, रा. पिंपळवाडी) हा युवक तहसील कार्यालयात आला. त्याने आपल्या उत्पन्न दाखल्याची पडताळणी करण्याची विनंती केली.
त्यानुसार, देशमुख यांनी दाखल्यावरील बारकोड क्रमांक तपासला असता, तो दाखला प्रत्यक्षात नवनाथ आनारसे या व्यक्तीसाठी दिनांक १९ मे २०२५ रोजी तहसील कार्यालयातून अधिकृतपणे जारी करण्यात आलेला असल्याचे आढळून आले. यामुळे शंका उत्पन्न झाली.या प्रकाराची माहिती महसूल सहाय्यक देशमुख यांनी तहसीलदार अमोल मोरे यांना दिली. त्यांनी तत्काळ संपूर्ण प्रकरणाची सखोल तपासणी केली असता, संबंधित दस्तऐवज खोटा असल्याचे स्पष्ट झाले.
सदर बनावट दाखला तयार करताना पूर्वीच्या अधिकृत दाखल्यावरील बारकोड आणि डिजिटल सहीचा वापर करून तो नवा बनवण्यात आला होता. तपासाअंती हे स्पष्ट झाले की, ग्रामपंचायत पिंपळवाडीचा ऑपरेटर प्रविण गोरक्षनाथ रोठे (वय २७) यानेच नवनाथ आनारसे यांना दिलेल्या उत्पन्न दाखल्यातील बारकोड आणि सहीचा वापर करून ज्ञानदेव वाकचौरे याला बनावट दाखला दिला होता.
या गंभीर प्रकाराची नोंद घेऊन रवींद्र देशमुख यांनी शिर्डी पोलीस ठाण्यात तक्रार दाखल केली. त्यानुसार, भारतीय न्याय संहिता २०२३ अंतर्गत फसवणूक आणि अन्य संबंधित कलमांखाली प्रविण रोठे याच्याविरोधात गुन्हा नोंदवून तपास सुरू करण्यात आला आहे
