Ahilyanagar News: अहिल्यानगर- जिल्ह्यातून आषाढी यात्रेसाठी पंढरपूरकडे मार्गस्थ होणाऱ्या १६० पालख्यांसोबत असलेल्या वारकऱ्यांच्या सुविधांसाठी राज्य सरकारने दोन कोटी ६१ लाख ८० हजार रुपयांचा निधी मंजूर केला आहे. पालकमंत्री राधाकृष्ण विखे-पाटील यांनी या निधीच्या माध्यमातून वारकऱ्यांना वॉटरप्रूफ मंडप, शौचालय, स्नानगृह, पिण्याचे पाणी, वैद्यकीय सुविधा आणि ग्रामपंचायत साहाय्य अनुदान उपलब्ध करून देण्याचे नियोजन केले आहे. ग्रामविकास विभागामार्फत हा निधी उपलब्ध होणार असून, जिल्हा प्रशासनाने या सुविधांसाठी तातडीने कार्यवाही सुरू केली आहे.
१६० पालख्या पंढरपूरकडे मार्गस्थ होणार
आषाढी यात्रा ही महाराष्ट्राच्या सांस्कृतिक आणि धार्मिक परंपरेचा अविभाज्य भाग आहे. अहिल्यानगर जिल्ह्यातून पैठण येथील संत एकनाथ महाराज, त्र्यंबकेश्वर येथील संत निवृत्तीनाथ महाराज, पिंपळनेर येथील संत निळोबाराय महाराज यांच्यासह सुमारे १६० पालख्या पंढरपूरकडे मार्गस्थ होतात. या पालख्यांसोबत लाखो वारकरी पंढरपूरच्या विठ्ठल-रखुमाई दर्शनासाठी प्रवास करतात. हा प्रवास पावसाळ्यात होत असल्याने वारकऱ्यांना अनेक अडचणींचा सामना करावा लागतो. यामुळे पालखी मार्गावरील सुविधांचे नियोजन करणे अत्यंत महत्त्वाचे आहे. पालकमंत्री राधाकृष्ण विखे-पाटील यांच्या पुढाकाराने अहिल्यानगर जिल्ह्यात यासाठी विशेष प्रयत्न केले जात असून, यंदा दोन कोटी ६१ लाख ८० हजार रुपयांचा निधी मंजूर झाला आहे.
२ कोटी ६१ लाख ८० हजार रूपयांचा निधी
ग्रामविकास विभागामार्फत मंजूर झालेल्या दोन कोटी ६१ लाख ८० हजार रुपयांच्या निधीतून वारकऱ्यांसाठी अनेक महत्त्वाच्या सुविधा उपलब्ध करून दिल्या जाणार आहेत. यामध्ये पावसाळ्यातील मुक्कामासाठी वॉटरप्रूफ मंडप, स्वच्छ शौचालये, स्नानगृह, पिण्याच्या पाण्याची व्यवस्था, वैद्यकीय सुविधा आणि ग्रामपंचायतींना साहाय्य अनुदान यांचा समावेश आहे. पालखी मार्गावरील गावांमध्ये या सुविधा पुरवण्यासाठी जिल्हा प्रशासनाने तातडीने कार्यवाही सुरू केली आहे. पालकमंत्री विखे-पाटील यांनी सर्व पालखी मार्गांवर या सुविधा वेळेत उपलब्ध व्हाव्यात, यासाठी प्रशासनाला स्पष्ट निर्देश दिले आहेत. या निधीच्या योग्य वितरणामुळे वारकऱ्यांचा प्रवास सुखकर आणि सुरक्षित होण्यास मदत होईल.
प्रशासकीय तयारी आणि बैठकीचे आयोजन
जिल्हाधिकारी कार्यालयात पालकमंत्री राधाकृष्ण विखे-पाटील यांच्या उपस्थितीत आषाढी यात्रेच्या नियोजनासाठी विशेष बैठक आयोजित करण्यात आली होती. या बैठकीला वरिष्ठ प्रशासकीय अधिकारी, प्रमुख देवस्थानांचे प्रतिनिधी आणि जिल्ह्यातील दिंड्यांचे प्रमुख उपस्थित होते. बैठकीत पालखी मार्गावरील अडचणींचा आढावा घेण्यात आला. वारकऱ्यांनी वॉटरप्रूफ मंडप, रस्त्यांच्या दुरुस्तीची गरज, शौचालय, पिण्याच्या पाण्याची व्यवस्था आणि वैद्यकीय सुविधा यासंबंधीच्या समस्या मांडल्या. या सर्व समस्यांवर तातडीने उपाययोजना करण्याचा निर्णय घेण्यात आला. पालकमंत्र्यांनी संबंधित प्रस्ताव राज्य शासनाकडे सादर करण्याचे आणि आवश्यक सुविधा तात्काळ उपलब्ध करून देण्याचे निर्देश दिले. विविध विभागांचे अधिकारी समन्वयक म्हणून काम करणार असून, या नियोजनाचा पॅटर्न सोलापूर जिल्ह्यातही लागू करण्यात येत आहे.
