राहाता- अहील्याबाई नगर परिसरातील उत्तर जिल्ह्याच्या विकासासाठी अत्यंत महत्त्वपूर्ण असलेल्या भंडारदरा जलाशयाच्या शताब्दी महोत्सवासाठी राज्य सरकारने मुख्यमंत्री देवेंद्र फडणवीस यांच्या अध्यक्षतेखाली समिती गठीत करण्याचा निर्णय घेतला आहे. या निर्णयामुळे धरणाचे संवर्धन, पर्यटनविकास आणि जिल्ह्याच्या सर्वांगीण प्रगतीस चालना मिळणार आहे.
भंडारदरा धरणास ‘आद्य क्रांतिकारक राघोजी भांगरे जलाशय’ असे नाव देण्याचा निर्णय यापूर्वीच घेण्यात आलेला आहे. यंदा धरणाला १०० वर्षे पूर्ण होत असल्याने, हे वर्ष विशेष पद्धतीने आणि विकासाभिमुख कार्यक्रमांद्वारे साजरे करावे, अशी संकल्पना जलसंपदा मंत्री राधाकृष्ण विखे पाटील यांनी मांडली असून त्यासाठी तयारी सुरू झाली आहे.
मुख्यमंत्री देवेंद्र फडणवीस यांच्या अध्यक्षतेखाली गठीत करण्यात आलेल्या शताब्दी महोत्सव समितीत उपमुख्यमंत्री अजित पवार, जलसंपदा मंत्री राधाकृष्ण विखे पाटील, राज्याचे मुख्य सचिव, जलसंपदा विभागाचे अतिरिक्त मुख्य सचिव, वित्त विभागाचे अपर मुख्य सचिव आणि गोदावरी पाटबंधारे विकास महामंडळाचे मुख्य कार्यकारी अधिकारी यांचा समावेश करण्यात आला आहे.
या समितीच्या माध्यमातून भंडारदरा जलाशयाचे सर्वंकष संवर्धन, तसेच या भागातील पर्यटनविकासासाठी उपाययोजना ठरवून त्यानुसार काम केले जाणार आहे. संबंधित विभागांमध्ये समन्वय साधून योजनांची अंमलबजावणी करण्यात येईल.
व अकोले तालुक्याच्या नैसर्गिक भौगोलिक पार्श्वभूमीवर उभारण्यात आलेल्या भंडारदरा धरणामुळे अकोले, संगमनेर, राहाता, श्रीरामपूर आणि नेवासा या तालुक्यांतील सिंचन क्षेत्रात मोठी वाढ झाली आहे. त्यामुळे या भागातील शेती, सहकार आणि आर्थिक विकासास भक्कम आधार मिळाला आणि जिल्ह्याचा विकास घडू शकला.
शताब्दी वर्षानिमित्त धरणाच्या संवर्धनाबरोबरच या परिसरातील पर्यटनविकासासाठी जलसंपदा मंत्री राधाकृष्ण विखे पाटील यांनी पुढाकार घेतला आहे. प्राथमिक आराखडा तयार करण्यात येत असून, या भागात रोजगार निर्मिती व्हावी आणि पर्यटकांना आकर्षित करता यावे यासाठी विशेष प्रयत्न केले जात आहेत. मुख्यमंत्री देवेंद्र फडणवीस यांच्या अध्यक्षतेखाली गठीत समिती हे शताब्दी वर्ष अधिक प्रभावी आणि विकासाभिमुख होण्यासाठी दिशादर्शक ठरणार आहे.
पर्यटनाला चालना मिळेल
भंडारदरा जलाशयाचा शताब्दी महोत्सव साजरा करण्याच्या दृष्टीने जलसंपदा विभागाने विशेष प्रयत्न सुरू केले आहेत. मुख्यमंत्री देवेंद्र फडणवीस यांच्या अध्यक्षतेखाली तयार करण्यात आलेल्या समितीच्या निर्णयाचे आपण स्वागत करतो. भंडारदरा जलाशयाचे संवर्धन आणि पर्यटनविकासाला यामुळे अधिकचे पाठबळ मिळेल, अशी प्रतिक्रिया जलसंपदा मंत्री राधाकृष्ण विखे पाटील यांनी दिली.
