Ahilyanagar News: नेवासा तालुक्यातील सौंदाळा ग्रामपंचायतीने महिलांच्या सक्षमीकरणासाठी आणि सामाजिक सुधारणेसाठी एक ऐतिहासिक पाऊल उचलले आहे. बुधवारी (दि. ११ जून २०२५) झालेल्या ग्रामसभेत हुंडाबंदीचा ठराव संमत करण्यात आला. यासोबतच हुंडा घेणाऱ्यांविरोधात माहिती देणाऱ्यांना ५,००० रुपये आणि कौटुंबिक हिंसाचाराची पुराव्यासह माहिती देणाऱ्यांना २,१०० रुपये बक्षीस देण्याचा महत्त्वपूर्ण निर्णय घेण्यात आला. पुणे येथील वैष्णवी हगवणे प्रकरणाच्या पार्श्वभूमीवर हा ठराव घेण्यात आला असून, यामुळे गावात हुंडा प्रथेला आळा बसण्यास आणि महिलांवरील हिंसाचाराला चाप बसण्यास मदत होईल, अशी आशा व्यक्त केली जात आहे.
हुंडाबंदी ठराव
सौंदाळा ग्रामपंचायतीने यापूर्वीही शिवीगाळ बंदी, बालविवाह बंदी आणि विधवा पुनर्विवाह यासारखे समाजहिताचे निर्णय घेऊन त्यांची प्रभावी अंमलबजावणी केली आहे. पुणे येथील वैष्णवी हगवणे यांच्या प्रकरणाने हुंडा आणि कौटुंबिक हिंसाचाराच्या मुद्द्यांना पुन्हा एकदा चर्चेत आणले. यामुळे प्रेरित होऊन सौंदाळा ग्रामपंचायतीने हुंडाबंदीचा ठराव संमत केला. या ठरावानुसार, हुंडा देणे किंवा घेणे याबाबत कोणतीही तक्रार आल्यास कठोर कारवाई केली जाईल. तसेच, कौटुंबिक हिंसाचाराच्या घटनांविरोधात पुराव्यासह माहिती देणाऱ्यांना बक्षीस देऊन सामाजिक सहभाग वाढवण्याचा प्रयत्न केला आहे.
समितीची स्थापना
हुंडाबंदी आणि कौटुंबिक हिंसाचाराविरोधातील कारवाई प्रभावीपणे राबवण्यासाठी सौंदाळा ग्रामपंचायतीने एक विशेष समिती स्थापन केली आहे. या समितीचे अध्यक्षपद सरपंच शरद आरगडे यांच्याकडे असून, त्यांच्यासह गावातील दहा महिलांचा समावेश आहे. ही समिती हुंडा प्रथा आणि कौटुंबिक हिंसाचारासंबंधी तक्रारींची शहानिशा करेल. तक्रारी प्राप्त झाल्यास समितीमार्फत तपास करून संबंधितांवर कायदेशीर कारवाई केली जाईल. याशिवाय, माहिती देणाऱ्या ग्रामस्थांना आर्थिक बक्षीस देऊन सामाजिक जागरूकता वाढवण्याचा प्रयत्न केला जाणार आहे. या समितीच्या स्थापनेमुळे गावातील महिलांना तक्रार नोंदवण्यासाठी एक सुरक्षित व्यासपीठ उपलब्ध झाले आहे.
ग्रामसभेची भूमिका आणि ग्रामस्थांचा सहभाग
बुधवारी झालेल्या ग्रामसभेत हा ठराव सर्वानुमते संमत करण्यात आला. ग्रामसभेला ग्रामविकास अधिकारी प्रतिभा पिसोटे, उपसरपंच कोमल आरगडे, सदस्य मंगल ज्ञानदेव आरगडे, छाया मीनीनाथ आरगडे यांच्यासह गावातील अनेक मान्यवर आणि ग्रामस्थ उपस्थित होते. यामध्ये गणेश आरगडे, भिवसेन गरड, राजेंद्र चामुटे, बंडू आरगडे, दादासाहेब आरगडे, बाळासाहेब आरगडे, ज्ञानदेव आरगडे, बबन आरगडे, कृष्णा चामुटे, सुनील आरगडे, दीपक मगर, जनार्धन आरगडे, अनिल आरगडे, शिवाजी आरगडे, श्रद्धा आरगडे, राणी आरगडे यांचा समावेश होता. ग्रामस्थांनी या ठरावाचे स्वागत केले असून, विशेषतः महिलांनी या निर्णयाला पाठिंबा दर्शवला आहे.
