अहिल्यानगर : शिवसेना उद्धव बाळासाहेब ठाकरे पक्षाचे शहरप्रमुख किरण गुलाबराव काळे (रा. वैभव कॉलनी, रेणावीकर शाळेजवळ, सावेडी अहिल्यानगर) यांना कोतवाली पोलिसांनी बलात्काराच्या गुन्ह्यात सोमवारी रात्री अटक केली. मंगळवारी दुपारी त्यांना न्यायालयासमोर हजर केले असता न्यायालयाने चार दिवासांची पोलिस कोठडी सुनावली.
कोतवाली पोलिस ठाण्यात कर्जत येथील २१ वर्षीय पीडित तरुणीच्या फिर्यादीवरून नगर शिवसेना शहरप्रमुख किरण गुलाबराव काळे यांच्याविरोधात नगरच्या कोतवाली पोलिस ठाण्यात २१ जुलै रोजी रात्री उशिरा बलात्काराचा गुन्हा दाखल झाला आहे. गुन्हा दाखल होताच पोलिसांनी किरण काळे यांना अटक केली.
पीडितेने फिर्यादीत म्हटले आहे की, तिच्या पतीला दारू पिण्याचे व्यसन होते. त्यामुळे तिचा पती तिला सतत त्रास द्यायचा. २०१९ च्या निवडणुकीच्या वेळी किरण काळे कर्जत येथे प्रचारासाठी गेले असता पीडितेने त्यांना पाहिले होते. त्यांनी भाषणात गोरगरिबांना मदत करत असल्याचे सांगितले होते. त्यामुळे पतीसोबत असलेल्या वादात मदत मिळावी म्हणून तिने सोशल मिडीयावरून काळे यांचा मोबाईलनंबर मिळविला. त्यावर संपर्क करून पतीपासून होणाऱ्या त्रासात मदत मागितली.
२०२१ पासून ते फोनवर एकमेकांच्या संपर्कात होते. २०२३ मध्ये काळे यांनी तिला नगरमध्ये बोलावून घेतले. ती एसटी बसने आल्यावर काळे तिला घेण्यासाठी कारने बसस्थानकाजवळ गेले. तेथून तिला कारमध्ये बसवून त्यांच्या चितळे रोड वरील संपर्क कार्यालयात नेले. तेथे पीडित महिलेला मदत करण्याचे आमिष दाखवून तिच्याशी जवळीक साधू लागले, त्यास पीडितेने विरोध करण्याचा प्रयत्न केला असता मला विरोध करू नको मी तुला सर्व मदत करतो, असे सांगत काळे यांनी तिच्यावर बलात्कार केला. याबाबत कोणाला सांगू नको, नाहीतर माझ्या खूप ओळखी आहेत, तुला जिवंत सोडणार नाही असा दम देऊन तिला पुन्हा बसस्थानकावर नेऊन सोडले.
त्यानंतर २०२३ ते २०२४ पर्यंत पुन्हा ३ वेळा किरण काळे यांनी पीडितेला स्वत: च्या संपर्क कार्यालयात बोलावून बलात्कार केला. तसेच ही गोष्ट कोणाला कळली तर जीवे मारण्याची धमकी किरण काळे यांच्याकडून देण्यात येत होती. या काळात त्यांनी कुठलीही मदत केली नाही. या दरम्यान पीडितेच्या पतीला तिचे किरण काळेंसोबत संबंध असल्याचा संशय आल्याने तो तिला आणखी त्रास देऊ लागला. पीडित महिला किरण काळे विरोधात तक्रार देण्यास घाबरत होती. एक दिवस तिने तिच्या चुलत सासूला सर्व हकीगत सांगितली.
सासूने ही माहिती भिंगारमधील एका व्यक्तीला सांगितली. त्यांनी दोघांना नगरमध्ये बोलावून घेतले. त्यांच्याकडून सर्व हकीकत ऐकून घेतल्यावर २१ जुलैला रात्री दोघींना घेऊन कोतवाली पोलिस ठाण्यात आले आणि फिर्याद दिली. सहायक पोलीस निरीक्षक तेजश्री थोरात यांनी मंगळवारी दुपारी आरोपी किरण काळे याला न्यायालयात हजर केले. तपासाकामी सात दिवसांची पोलीस कोठडीची मागणी करण्यात आली. न्यायालयाने २५ जुलैपर्यंत पोलिस कोठडीत ठेवण्याचे आदेश दिले आहेत.
