२८ फेब्रुवारी २०२५ अकोले : बंद घरात माणूस मृतावस्थेत आढळल्याची अनेक उदाहरणे तुम्ही ऐकली असतील पण, चक्क बिबट्या देखील बंद घरात मृतावस्थेत आढळला असल्याची बातमी तुम्ही कदाचित पहिल्यांदाच ऐकली असेल.बंद घराच्या परिसरात दुर्गंधी सुटल्यानंतर ही बाब लोकांच्या निदर्शनास आली.अकोले शहराजवळ नवीन नवलेवाडी येथे दुबळकुंडी रोडवर मध्य वस्तीत हा प्रकार घडला.
या ठिकाणी वर्दळीच्या रस्त्यालगत एका जुन्या पडक्या घरात एक-दीड वर्ष वयाचा बिबट्या मृत अवस्थेत गुरुवारी सकाळी आढळला. दोन-तीन दिवसांपूर्वीच तो मयत झाला असावा असा अंदाज आहे.बुधवारी महाशिवरात्र असल्यामुळे रस्त्याने वर्दळ होती.
पण, या बंद घराजवळची दुकाने बंद होती, गुरुवारी सकाळी दहाच्या दरम्यान या घरातून दुर्गंधी सुटल्याची बाब शेजारी संतोष काठे व किसन चौधरी यांच्या लक्षात आली.त्यांनी दरवाजातून आत डोकावून पाहिल्यावर त्यांना आतमध्ये मृत बिबट दिसला.
माजी उपसरपंच राकेश देशमुख यांनी वनखात्यास ही बाब कळवली. वनकर्मचारी रामहारी आंबरे, सूर्यभान नरवडे यांनी नागरिकांच्या मदतीने बिबट्याला चास सुगाव वन रोपवाटिकेत नेले.त्याचे शवविच्छेदन करून अंत्यसंस्कार करण्यात आले. शवविच्छेदन अहवालानंतर बिबट मृत्यूचे खरे कारण समजेल असे वनरक्षक अंकुश काकड यांनी सांगितले.
बिबट्याचा मृत्यू का ?
बंद घरात घुसण्यासाठी पाठीमागून छोटी जागा होती. तेथून बिबट्या आत घुसला. पण, बिबट्या आत घुसताना तेथे काही अडगळीचे सामान होते ते खाली पडले व हा रस्ता बंद झाला.त्यामुळे त्याला बाहेर पडता आले नाही.
या घराशेजारी कुक्कुटपालन असल्याने तेथील पक्षांचा आवाज सुरु असतो. त्यामुळे या बिबट्याने डरकाळी फोडल्यानंतरही त्याचा आवाज बाहेर कुणालाही आला नाही. जास्त दिवस आत राहिल्याने पाणी व अन्न न मिळाल्याने त्याचा मृत्यू झाला, असा प्राथमिक अंदाज आहे.
