शेवगाव- छत्रपती संभाजीनगरला नातवासोबत जाणाऱ्या एका महिलेचा राज्य परिवहन महामंडळाच्या बसच्या मागच्या चाकाखाली सापडून मृत्यू झाला.
ही दुर्दैवी घटना बुधवारी सकाळी बसस्थानकाच्या आवारात घडली. या प्रकरणी शेवगाव पोलिसांनी अकस्मात मृत्यूची नोंद केली आहे.
मृत्यू झालेल्या महिलेचं नाव मथुराबाई मधुकर पटारे असं आहे. त्या पाथर्डी तालुक्यातल्या निंबेनांदूर गावच्या रहिवासी होत्या.
त्या आपल्या नातवाला घेऊन छत्रपती संभाजीनगरला निघाल्या होत्या.
पण बुधवारी सकाळी पैठण आगाराची मढी ते छत्रपती संभाजीनगर जाणारी बस (क्रमांक एमएच २० बीएल ११६२) निघताना त्या मागच्या चाकाखाली सापडल्या आणि त्यातच त्यांचा जीव गेला.
या घटनेनंतर शेवगाव पोलिसांनी मथुराबाईंचा मृतदेह शवविच्छेदनासाठी सरकारी दवाखान्यात पाठवला. शवविच्छेदन झाल्यावर तो नातेवाइकांच्या ताब्यात अंत्यविधीसाठी देण्यात आला.
ही बस हनुमंत गोवर्धन चव्हाण (रहिवासी: तागडगाव, ता. शिरूर कासार, जि. बीड) चालवत होते. आता पुढचा तपास पोलिस हवालदार आबासाहेब गोरे करत आहेत.
