शिर्डीतील ५०० पेक्षाही अधिक दलित बांधवांची घरे बुल्डोजरच्या सहाय्याने पाडले गेले. याच्या निषेधार्थ व या सर्वांचे पुनर्वसन व्हावे या मागणीसाठी प्रांताधिकारी कार्यालयावर बिऱ्हाड मोर्चा काढण्यात आला. यावेळी आंदोलकांनी तेथेच ठिय्या मांडत तेथेच चुली पेटवून स्वयंपाकही केला.
शिर्डीतील ५०० पेक्षाही अधिक दलित बांधवांची घरे बुल्डोजरच्या सहाय्याने पाडण्याचा प्रकार अत्यंत संतापजनक आहे. ६०-७० वर्षांपासून हे बांधव नियमितपणे लाईटबील घरपट्टी पाणीपट्टी भरत होते. तरी त्यांची घरे उद्ध्वस्त करण्यात आली ही बाब अमानवी व असंवेदनशील असून कोणाचेही मन हेलावेल अशी घटना आहे. आज (दि.३) या सर्व पिडीत कुटुंबियांनी बिऱ्हाड मोर्चा काढला.
प्रांताधिकारी कार्यालयासमोर मोठ्या संख्येने बिऱ्हाड मोर्चा आणला व त्याठिकाणी चूल पेटवून स्वयंपाक बनविण्याचे आंदोलन सुरु केले. कोणतेही ठोस कारण नसताना गरीब व निराधार कुटुंबांना बेघर करण्यात आले त्यामुळे अनेक कुटुंब रस्त्यावर आले असून त्यांचा जगण्याचा आधार हिरावला गेला आहे. त्या बेघरांमध्ये आजारी व्यक्ती आणी लहान मुलेही होती.
एक दिवसाची प्रसुती झालेल्या महिलेलाही बेघर करण्यात आले. ही करवाई सामाजिक अन्यायाचे प्रतिक ठरले आहे असा घणाघात यावेळी आंदोलकांनी केला. दरम्यान, भाजप नेते राजेंद्र पिपाडा यांनी म्हटलं की, याबाबत आपण मुख्यमंत्री देवेंद्र फडणवीस यांची भेट घेऊन या कुटुंबांना तात्काळ सरकारी जागेत घरे बांधून देण्यासाठी आग्रह धरणार आहोत.
या आगोदरही आपण महसूल मंत्री बावनकुळे यांची भेट घेतली. त्यांनीही पुनर्वसन करुन घरे बांधून देण्याचे आश्वासन दिले आहे. यावेळी आरपीआयचे दिलीपराव वाघमारे, माजी नगरसेवक सुरेश आरणे, वंचित बहुनजनचे प्रदेशाध्यक्ष अनिल जाधव, प्रवीण आल्हाट, विशाल कोळगे, सचिन आरणे आदींसह मोठ्या संख्येने महिला व युवक उपस्थित होते.
