महावितरणने आता एक नवी योजना आणली आहे, ज्यामुळे वीजबिल ऑनलाईन भरणाऱ्यांना स्मार्ट फोन जिंकायची संधी मिळणार आहे! लोकांनी डिजिटल पद्धतीने वीजबिल भरावं आणि त्याचा टक्का वाढावा, यासाठी ही “लकी डिजिटल ग्राहक योजना” सुरू केली आहे.
या योजनेत भाग घेणाऱ्या विजेत्यांना स्मार्ट फोन आणि स्मार्ट वॉचसारखी आकर्षक बक्षिसं मिळतील. याचा पहिला लकी ड्रॉ ७ एप्रिलला ऑनलाईन काढला जाणार आहे.
महावितरणला ग्राहकांचा वेळ, मेहनत आणि पैसे वाचवायचे आहेत, म्हणून त्यांनी वीजबिल ऑनलाईन भरण्यावर भर दिला आहे. यासाठी त्यांचं संकेतस्थळ आणि मोबाईल ॲप तयार आहे,
जिथून तुम्ही सहज बिल भरू शकता. इतकंच नाही, तर ऑनलाईन बिल भरलं की ०.२५ टक्के सूटही मिळते. त्यामुळे आता राज्यात ७० टक्क्यांहून जास्त लोक ऑनलाईन बिल भरतायत.
पण हा आकडा अजून वाढावा, असं महावितरणला वाटतं, म्हणूनच ही योजना आणली आहे. या योजनेत सर्व लघुदाब वीज ग्राहक, जे ऑनलाईन बिल भरतात, ते सहभागी होऊ शकतात.
१ जानेवारी ते ३१ मे २०२५ या काळात सलग तीन किंवा त्यापेक्षा जास्त वेळा वीजबिल ऑनलाईन भरलं, तर तुम्हाला या योजनेचा फायदा घेता येईल. पहिला लकी ड्रॉ ७ एप्रिलला होईल, त्यानंतर मे आणि जूनमध्ये आणखी ड्रॉ काढले जातील, असं महावितरणने सांगितलं आहे.
बक्षिसंही खूप छान आहेत! प्रत्येक उपविभागातून एका ग्राहकाला पहिलं बक्षीस म्हणून स्मार्ट फोन मिळेल, म्हणजे एकूण ६५१ जणांना हे बक्षीस मिळणार आहे. दुसऱ्या क्रमांकाचं बक्षीस म्हणून प्रत्येक उपविभागातून दोन जणांना स्मार्ट फोन मिळेल, म्हणजे १३०२ विजेते.
आणि तिसऱ्या क्रमांकाचं बक्षीस म्हणूनही प्रत्येक उपविभागातून दोन जणांना स्मार्ट वॉच मिळेल, म्हणजे १३०२ जणांना हे बक्षीस मिळणार आहे. त्यामुळे वीजबिल ऑनलाईन भरायची सवय लावून घ्या, कोण जाणे, तुमचं नशीब तुम्हाला स्मार्ट फोन जिंकून देईल.
