५ फेब्रुवारी २०२५ संगमनेर : सर्वसामान्यांसाठी गाव पातळीवरील विविध प्रश्न सोडविण्यासाठी संगमनेर विधानसभा मतदार संघात लवकरच ‘आमदार आपल्या गावात’ हे अभियान सुरु करणार असल्याची घोषणा आमदार अमोल खताळ यांनी केली.तालुक्यातील डिग्रस येथे एकलव्य जयंती व प्राथमिक शाळा खोली भूमिपूजन आ. खताळ यांच्या हस्ते झाले. त्यावेळी आयोजित कार्यक्रमात ते बोलत होते. अध्यक्षस्थानी ज्येष्ठ नागरिक हरी कोरडकर होते.
भाजपा तालुका उपाध्यक्ष तथा मालुंजेचे माजी संरपच संदीप घुगे, डिग्रसचे सरपंच अशोक खेमनर, उपसंरपच रंगन्नाथ बिडगर, भाजपचे ज्येष्ठ नेते दादा गुंजाळ, शिवसेना तालुकाप्रमुख रामभाऊ राहाणे, शहरप्रमुख विनोद सूर्यवंशी, खांबा गावचे सरपंच रवी दातीर, ड. संदीप जगनर, मच्छिंद्र तांबडे, शहाजी बिडगर, वामन बर्डे, अनिल खेमनर, मोठ्याभाऊ खेमनर, मच्छिंद्र कोरडकर, साहेबराव नान्नर गणपत बिडगर, खंडू बिडगर, मुरलीधर बर्डे, ग्रामसेविका रुपाली कहाणे आदी उपस्थित होते.
आ. खताळ पुढे म्हणाले की, संगमनेर तालुक्यात महायुतीचा आमदार नसताना सुद्धा मंत्री राधाकृष्ण विखे पाटील यांनी तालुक्याला सहाशे कोटीचा निधी दिला होता तर आता संगमनेर विधानसभेचा आमदारच महायुतीचा असल्यामुळे मुख्यमंत्री देवेंद्र फडणवीस, उपमुख्यमंत्री तथा शिवसेनेचे मुख्य नेते एकनाथ शिंदे व अजित पवार, पालकमंत्री राधाकृष्ण विखे यांनी सर्वांपेक्षा जास्त निधी दिला जाईल, असे सांगितले आहे.
त्यामुळे या तालुक्याच्या विकासासाठी हजारो कोटी रुपयांचा निधी मिळेल यात शंका नाही. या निधीतून या मतदार संघात मुलभूत सुविधा निर्माण करु, तसेच हा तालुका अनेक वर्षांपासून पाण्यापासून काहींनी वंचित ठेवला आहे, मात्र आपण साकूर पठार भाग, तळेगाव, निमोण या भागातील जनतेचा अनेक वर्षांचा पाण्याचा प्रश्न सोडवून हा तालुका टँकरमुक्त करण्यासाठी प्राधान्यक्रम राहील, असेही आ. खताळ यांनी या वेळी सांगितले. प्रास्ताविक सरपंच अशोकराव खेमनर यांनी केले तर आभार ज्ञानदेव श्रीराम यांनी मानले.
महायुतीचा झेंडा फडकावा
ज्याप्रमाणे तुम्ही सर्वांनी विधानसभा निवडणुकीत महायुतीला साथ देत मला आमदार केले. अशीच साथ आगामी होणाऱ्या जिल्हा परिषद, पंचायत समिती, नगरपालिकेसह, साखर कारखाना या सर्व स्थानिक निवडणुकीत द्यावी असे सांगत या सर्व ठिकाणी महायुतीचा झेंडा फडकविण्यासाठी कामाला लागा, असा सल्ला आ. खताळ यांनी महायुतीच्या कार्यकर्त्यांना दिला.
