अहमदनगर Live24 टीम, 21 फेब्रुवारी 2022 :- कर्जत (जि. रायगड) येथील एका बांधकाम व्यावसायिकाला स्वस्तात सोने देण्याच्या आमिषाने नगर जिल्ह्यात बोलवून, त्यांच्यावर हल्ला करून सुमारे दहा लाखांना लुटण्यात आले आहे.
या संदर्भात संतोष रामचंद्र घुडे यांनी कर्जत पोलीस ठाण्यात फिर्याद दाखल केली होती. यांनतर कर्जत पोलिसांनी व्यापाऱ्यांना लुटणाऱ्या एका टोळीचा पर्दाफाश केला आहे.
टोळीतील एका आरोपीला पोलिसांनी अटक केली असून आता संपूर्ण टोळी हाती लागण्याची शक्यता आहे. याबाबत अधिक माहिती अशी की, कर्जत तालुक्यातील कोंभळी फाटा येथे ९ फेब्रुवारी २०२२ रोजी अशीच एक घटना घडली होती.
आरोपींच्या टोळीने त्यांच्या पद्धतीनुसार बांधकाम व्यावसायिक संतोष रामचंद्र घुडे, (वय ४३, रा. आंबिवली ता. कर्जत, जि. रायगड व त्यांचा मित्र यांना स्वस्तात सोने देण्याचे आमिष दाखविले.
टोळीतील एक साथिदार विठ्ठल जाधव (खरे नाव माहीत नाही) यांनी त्यांच्याशी संपर्क साधला. त्यांनी सोने घेण्याची तयारी दर्शविताच त्यांना नगर-सोलापूर रोडवर कोंभळी फाट्याजवळील शेतात पैसे घेऊन बोलाविले. त्यांच्यावर विश्वास ठेवून घुडे व त्यांचा मित्र तेथे आले.
तेव्हा तेथे दबा धरून बसलेल्या दहा ते बारा जाणांच्या टोळीने त्यांच्यावर हल्ला केला. घुडे यांना लाकडी दांड्याने मारहाण केली. त्यांच्या डोळ्यात मिरचीची पूड टाकून त्यांच्याकडील दहा लाख रुपये व तीन मोबाईल हँडसेट असा दहा लाख, १८ हजार रुपयांचा मुद्देमाल घेऊन आरोपी पळून गेले आहे.
घुडे यांनी पोलीस ठाण्यात धाव घेतली व चोरट्याविरूद्ध फिर्याद केली. त्यानुसार दरोड्याचा गुन्हा दाखल करण्यात आला. दरम्यान, या गुन्ह्याचा तपास करताना कर्जतचे पोलिस निरीक्षक चंद्रशेखर यादव यांनी आरोपींची माहिती मिळविण्यास सुरवात केली.
तेव्हा त्यांना आरोपी सचिन आल्या पवार (रा. राक्षसवाडी ता. कर्जत) याच्याबद्दल पोलिसांना माहिती मिळाली. तो कुळधरण परिसरात असल्याचे समजल्यावर पोलिसांचे पथक तेथे गेले. तेथे आरोपीला अटक केली. त्याच्याकडे विचारपूस केल्यावर त्याने गुन्ह्याची आणि साथिदारांचीही माहिती दिली.
त्याला पाच दिवसांची पोलिस कोठडी मिळाली असून साथिदारांचा शोध सुरू करण्यात आला आहे. पोलिस उपअधीक्षक अण्णासाहेब जाधव यांच्या मार्गदर्शनाखाली पोलिस निरीक्षक चंद्रशेखर यादव, पोलीस उपनिरीक्षक अमरजित मोरे, अमंलदार अंकुश ढवळे, सुनील चव्हाण, पांडुरंग भांडवलकर, शाम जाधव, सुनील खैरे, महादेव कोहक, गोवर्धन कदम यांच्या पथकाने ही कामगिरी केली.
आरोपी फसवणूक कशी करतात, याबद्दल पोलिस निरीक्षक चंद्रशेखर यादव यांनी सांगितले की, या भागात अशा प्रकारचे गुन्हे करणाऱ्या टोळ्या आहेत.
बाहेरच्या जिल्ह्यातील व्यावसायिकांना शोधून, त्यांचा विश्वास संपादन करून त्यांना अशा पध्दतीने लुबाडले जाते. महामार्गाचे काम सुरू असताना खोदकामात सोने सापडले, जुन्या वाड्यात सोने सापडले ते स्वस्तात विकायचे आहे, अशी कारणे सांगून चोरटे विश्वास संपादन करतात.
अनेकदा सुशिक्षित मंडळीही त्यांच्या बोलण्याला फसल्याचे आढळून येते. त्यामुळे अशा गोष्टींवर आणि कोणतीच गोष्टी स्वस्तात मिळतेय यावर नागरिकांनी विश्वास ठेवू नये, असे आवाहनही यादव यांनी केले आहे.
