अहमदनगर Live24 टीम, , 03 फेब्रुवारी 2022 :- नगर तालुक्यातील मांंजरसुंबा गावात ग्रामपंचायत हद्दीत सुरू असलेल्या रस्त्याला विद्यमान सरपंच पतीनेच विरोध केला आहे. त्यांना समजून सांगण्यासाठी गेलेल्या गावातील समाजसेवकाला सरपंच पतीसह तिघांनी मारहाण केली.
या मारहाणीत डॉ. रामनाथ गोविंद कदम (वय 36 रा. मांजरसुंबा) हे जखमी झाले असून त्यांच्यावर नगर शहरातील खासगी रूग्णालयात उपचार सुरू आहेत.
दरम्यान त्यांच्या फिर्यादीवरून एमआयडीसी पोलिसांनी पोलीस ठाण्यात तिघांविरूध्द गुन्हा दाखल केला आहे. याध्ये सरपंच पती भाऊसाहेब रावसाहेब कदम, ग्रामपंचायत सदस्य किरण शिवाजी कदम व देविदास ऊर्फ पप्पु नारायण कदम (सर्व रा. मांजरसुंबा) अशी गुन्हा दाखल झालेल्यांची नावे आहेत.
याबाबत अधिक माहिती अशी, जिल्हा परिषद निधीमधून मांंजरसुंबा गावात रस्त्याचे काम सुरू असताना ते काम सरपंच पती भाऊसाहेब कदम, ग्रामपंचायत सदस्य किरण कदम व देविदास ऊर्फ पप्पु कदम यांनी बंद पाडले होते.
याबाबतची माहिती ग्रामपंचायत सदस्य देविदास विठ्ठल कदम यांनी डॉ. रामनाथ कदम यांना दिली. डॉ. कदम लगेच रस्ता काम सुरू असलेल्या ठिकाणी गेले.
त्यावेळी सरपंच पती भाऊसाहेब कदम, पप्पु ऊर्फ देविदास कदम यांनी डॉ. कदम यांना लोखंडी गज व कुर्‍हाडीच्या दांड्याने मारहाण करून जखमी केले.असल्याचे फिर्यादीत म्हटले आहे.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम
