अकोले तालुक्यातील अगस्ती सहकारी साखर कारखान्याचा गळीत हंगाम २०२३-२४ (दि.८) ऑक्टोबर रोजी सुरु झालेला असून, या गळीत हंगामासाठी इतर साखर कारखान्याचे बरोबरीने पहिली ऊचल २७०० रुपये प्रतिटन देणार असल्याचे कारखान्याचे चेअरमन सिताराम गायकर व व्हा. चेअरमन सुनिता भांगरे यांनी नुकतेच जाहिर केले.
संचालक मंडळाच्या नुकत्याच झालेल्या बैठकीत ते बोलत होते. त्यानुसार पुढील आठवड्यात ऊस पुरवठादार शेतकऱ्यांचे खात्यात ऊस पेमेंट जमा करण्यात येईल. असे सांगण्यात आले आहे.
कारखाना कार्यस्थळावर संचालक मंडळाची बैठक होऊन त्यामध्ये प्रथम ऊचल देण्यासाठी सविस्तर चर्चा होऊन यावर्षी गळीतास येणाऱ्या ऊसास पहिली उचल २७०० रुपये प्रतिटन देण्याचा निर्णय सर्वानुमते घेण्यात आला.
कारखान्याची आर्थिक परिस्थिती हलाखीची असतांनाही देखील संचालक मंडळाने २७०० रुपये प्रतिटन भाव देण्याचे ठरविलेले असल्याने ऊस पुरवठादार शेतकऱ्यांनी आंदोलन करु नये व कारखान्यास सहकार्य करावे.
तसेच अकोले तालुक्यातील ऊस पिकविणारे सर्व शेतकऱ्यांनी ऊस इतर कारखान्यांना न देता अगस्ती कारखान्यासच गळीतास द्यावा, असे आवाहन चेअरमन व व्हा. चेअरमन यांनी केले.
या सभेत कारखान्याचे संचालक मिनानाथ पांडे, परबतराव नाईकवाडी, रामनाथ वाकचौरे, अशोकराव देशमुख, अशोकराव आरोटे, मच्छिद्र धुमाळ, पाटीलबुवा सावंत, विकास शेटे, विक्रम नवले, मनोज देशमुख, प्रदिप हासे व कार्यकारी संचालक सुधिर कापडणीस उपस्थित होते.
