माजी शिक्षणमंत्री बाळासाहेब थोरात यांच्या मार्गदर्शनाखाली गुणवत्ता पूर्ण शिक्षणासह महाराष्ट्राच्या सांस्कृतिक क्षेत्रात मानबिंदू ठरलेल्या अमृतवाहिनी शिक्षण संस्थेच्या मेधा महोत्सव 2025 मध्ये रविवार दिनांक 2 फेब्रुवारी 2025 रोजी सायं.6 वा. बॉलीवूडचा आघाडीचा गायक व संगीतकार अमाल मलिक यांचा लाईव्ह कॉन्सर्ट होणार असून दुपारी लेखक व व्याख्याते शरद तांदळे हे विद्यार्थ्यांशी संवाद साधणार असल्याची माहिती संस्थेच्या विश्वस्त सौ.शरयूताई देशमुख यांनी दिली आहे.
मेधा महोत्सवाबाबत अधिक माहिती देताना सौ.शरयूताई देशमुख म्हणाल्या की, मेधा महोत्सवामुळे विद्यार्थ्यांच्या कलागुणांना वाव मिळत असून या महोत्सवात मागील आठ वर्षांमध्ये जागतिक कीर्तीचे शास्त्रज्ञ, क्रीडापटू, मराठी व हिंदी चित्रपट सृष्टीतील अभिनेते अभिनेत्री यांसह अनेक दिग्गज व्यक्तींनी विद्यार्थ्यांशी संवाद साधला आहे. सांस्कृतिक,कला,क्रीडा,पेंटिंग, वादन गायन यांसह विद्यार्थ्यांना प्रोत्साहन मिळावे याकरता विविध तज्ञ व्यक्तींचे मार्गदर्शन आयोजित केले जात असते.
यावर्षी रविवार दिनांक 2 फेब्रुवारी 2025 रोजी सकाळी 10.30 वाजता मेधा महोत्सवाचे उद्घाटन माजी शिक्षण मंत्री बाळासाहेब थोरात यांच्या शुभहस्ते होणार असून यावेळी माजी आमदार डॉ.सुधीर तांबे, विश्वस्त सौ.शरयुताई देशमुख, डॉ.जयश्रीताई थोरात, युवा नेते राजवर्धन थोरात, व प्रसिद्ध साहित्यिक, लेखक आणि उद्योजक शरद तांदळे यांचे व्याख्यान होणार आहे.
यावेळी अमृतवाहिनी संस्थेतील सर्व शाखांमधील माजी विद्यार्थ्यांचा स्नेह मेळावा आयोजित केलेला आहे. हे सर्व माजी विद्यार्थी त्या त्या शाखांमध्ये जाऊन विद्यमान विद्यार्थ्यांशी संवाद साधून त्यांना मार्गदर्शन करणार आहेत.
यानंतर सायंकाळी 6 वाजता मेधा मैदानावर बॉलीवूडमधील आघाडीचा गायक व संगीतकार अमाल मलिक याचा लाईव्ह कॉन्सर्ट होणार आहे. यावेळी विविध रिल स्टारसह उपस्थित राहणार असून या कार्यक्रमाची मेधा मैदानावर जय्यत तयारी सुरू आहे.
तरी या कार्यक्रमासाठी सर्व पालक व विद्यार्थी, माजी विद्यार्थी यांनी मोठ्या संख्येने उपस्थित राहावे असे आवाहन मुख्य कार्यकारी अधिकारी अनिल शिंदे, मेघा समन्वयक प्राचार्य डॉ. एम.ए.वेंकटेश, प्राचार्य व्ही.बी.धुमाळ, सांस्कृतिक समन्वयक डॉ.विलास शिंदे, डॉ.जे.बी.गुरव यांच्यासह सर्व प्राचार्य व अमृतवाहिनी शिक्षण संस्थेच्या वतीने करण्यात आले आहे.
