Ahmednagar News : अहमदनगरमधील गुन्हेगारी घटना कमी होण्याचे नाव घेत नाही. आता आणखी एक धक्कादायक वृत्त नगर तालुक्यातून आले आहे. शेतकऱ्याच्या दुचाकीला वाहनाची धडक देऊन त्याला जीवे ठार मारण्याचा प्रयत्न केल्याची घटना घडली आहे. नगर तालुक्यातील नगर – जामखेड रस्त्यावरील चिंचोडी पाटील गावच्या शिवारात ही घटना घडली.
दिलीप रामभाऊ कोकाटे (वय ४८ रा. ससे वस्ती, चिंचोडी पाटील) असे जखमी शेतकऱ्याचे नाव आहे. त्यांनी दिलेल्या फिर्यादीवरून नगर तालुका पोलीस ठाण्यात दोघांविरोधात खूनाचा प्रयत्न कलमान्वये गुन्हा दाखल करण्यात आला आहे. शरद खंडु पवार (रा. चिंचोडी पाटील) व सुरज किशोर भोज (रा. आष्टी, ता. आष्टी, जि. बीड) अशी गुन्हा दाखल झालेल्यांची नावे आहेत. ही घटना मंगळवारी (दि. २३) दुपारी घडली.
फिर्यादी यांनी शरद पवार याच्या विरोधात अर्ज केला आहे. त्याचा राग पवार याच्या मनात होता. फिर्यादी मंगळवारी दुपारी नगर- जामखेड रस्त्यावरून दुचाकीवर जात असताना चिंचोडी पाटील गावच्या शिवारात चिकन सेंटर समोर त्यांच्या दुचाकीला शरद पवार याने त्याच्या ताब्यातील वाहनाची धडक दिली.
धडक देऊनही अजून कसा जिवंत राहिला, तुला संपविल्याशिवाय राहणार नाही, असे म्हणून दोघांनी फिर्यादीला मारहाण केली. वाहनाच्या बोनेटवर डोके आपटले. दरम्यान, फिर्यादीच्या दुचाकीला धडक दिल्याने ती दुचाकी रस्त्याने जाणाऱ्या एका महिलेसह तिच्या सोबतच्या दोन अल्पवयीन मुलांच्या अंगावर गेल्याने ते तिघे जखमी झाले असल्याचे फिर्यादीत म्हटले आहे. याप्रकरणी अधिक तपास पोलीस करत आहेत.
