श्रीगोंदा- संत शेख महंमद महाराज यांच्या इतिहासाशी छेडछाड करण्याचा प्रयत्न त्यांचे तथाकथित वारस आमीन शेख करत असल्याचा गंभीर आरोप काँग्रेस नेते घनश्याम शेलार यांनी केला आहे. पत्रकार परिषदेत बोलताना त्यांनी आमीन शेख यांच्यावर मंदिराची वक्फ बोर्डाकडे दर्गा म्हणून नोंदणी करून संतांचा हिंदू वारसा नष्ट करण्याचा डाव असल्याचा आरोप केला.
यासोबतच, संतांचे खरे वंशज अय्याज शेख यांनीही आमीन शेख यांच्यावर खोटे दावे करून संभ्रम निर्माण करण्याचा प्रयत्न करत असल्याचा आरोप केला. या वादामुळे श्रीगोंद्यातील ग्रामदैवत असलेल्या संत शेख महंमद महाराज यांचा इतिहास आणि वारसा यावरून तीव्र आंदोलन सुरू आहे.
इतिहास बदलण्याचा प्रयत्न
घनश्याम शेलार यांनी पत्रकार परिषदेत सांगितलं की, संत शेख महंमद महाराजांनी भागवत धर्माचा प्रसार करत योगसंग्राम, पवन विजय आणि अभंग गाथा यासारखे ग्रंथ लिहिले. “आमीन शेख यांनी संतांचा हिंदू वारसा मिटवून त्यांचा इतिहास बदलण्याचा प्रयत्न केला आहे,” असं शेलार यांनी ठामपणे सांगितलं.
त्यांनी २००८ मध्ये आमीन शेख यांनी संतांबाबत चुकीचं पुस्तक प्रकाशित करून त्याचं वाटप केल्याचा उल्लेख केला, ज्यामुळे त्यावेळी मोठा वाद झाला होता. “आमीन शेख यांचा हेतू शुद्ध नाही. त्यांनी संतांचा इतिहास आणि श्रद्धास्थानाशी खेळण्याचा प्रयत्न केला आहे,” असं शेलार यांनी आरोप केला.
वक्फ बोर्ड नोंदणीचा वाद
संत शेख महंमद महाराज यांच्या मंदिराची १९५३ मध्ये मठ म्हणून नोंदणी झाली होती. मात्र, आमीन शेख यांनी मंदिराला दर्गा म्हणून दर्गा ट्रस्ट स्थापन करत त्याची वक्फ बोर्डाकडे नोंदणी केल्याचा आरोप शेलार यांनी केला. “मंदिराचा जीर्णोद्धाराला आमचा विरोध नाही, पण दर्गा म्हणून वक्फ बोर्डाकडे नोंदणी करणं आम्हाला मान्य नाही,” असं त्यांनी स्पष्ट केलं. शेख महंमद बाबा दर्गा ट्रस्ट रद्द करून मंदिराचा जीर्णोद्धार करण्याची मागणी करत आंदोलन सुरू असल्याचं शेलार यांनी सांगितलं. या आंदोलनाला गावकऱ्यांचा मोठा पाठिंबा मिळत आहे, आणि संतांचा हिंदू वारसा जपण्याचा निर्धार आंदोलकांनी व्यक्त केला आहे.
नोंदणीचा दावा लपवण्याचा आरोप
अॅड. श्रीनिवास पत्की यांनी आमीन शेख यांनी वक्फ बोर्डाकडे केलेली नोंदणी लपवल्याचा गंभीर आरोप केला. “आमीन शेख यांनी एका खटल्यात हा दावा वक्फ बोर्डाकडे वर्ग करण्याचा प्रयत्न केला. ही नोंदणी २०२०-२१ मध्ये आमच्या लक्षात आली,” असं पत्की यांनी सांगितलं. त्यांनी आमीन शेख यांचा हेतू संशयास्पद असल्याचं नमूद केलं. “संतांचं मंदिर हे हिंदू-मुस्लिम ऐक्याचं प्रतीक आहे. त्याला दर्गा म्हणून नोंदवणं हा संतांच्या वारशाशी विश्वासघात आहे,” असं त्यांनी सांगितलं. या नोंदणीविरोधात कायदेशीर लढाई लढण्याचा निर्णय आंदोलकांनी घेतला आहे.
तिव्र आंदोलनाचा इशारा
बाबासाहेब भोस यांनी या वादावर तोडगा काढण्यासाठी स्थानिक नेत्यांशी चर्चा सुरू असल्याचं सांगितलं. “आमदार विक्रम पाचपुते आणि माजी मंत्री बबनराव पाचपुते यांच्यासह आम्ही एकत्र बसणार आहोत. जर यावर तोडगा निघाला नाही, तर तीव्र आंदोलन करू,” असं त्यांनी जाहीर केलं. आंदोलकांनी वक्फ बोर्डाची नोंदणी रद्द होईपर्यंत मागे हटणार नसल्याचं स्पष्ट केलं. “संतांचा वारसा आणि मंदिराचं पावित्र्य आम्ही जपणार आहोत,” असं भोस यांनी सांगितलं.
वंशजांचा वाद
संत शेख महंमद महाराजांचे खरे वंशज अय्याज शेख यांनी आमीन शेख यांच्यावर खोटे दावे करण्याचा आरोप केला. “आमीन शेख हे जाणूनबुजून चुकीची माहिती पसरवत आहेत. ते खरे वंशज नाहीत. आमच्या पूर्वजांनी त्यांच्या पूर्वजांना मदतीसाठी आणलं होतं, पण आता ते स्वतःला वंशज म्हणवत आहेत,” असं अय्याज शेख यांनी सांगितलं. त्यांनी या प्रकरणात न्यायालयीन लढाई लढत असल्याचं सांगितलं आणि गावकऱ्यांनी आपली साथ द्यावी, असं आवाहन केलं. “हा वाद आता संपला पाहिजे. गावकऱ्यांनीच निर्णय घ्यावा,” असं त्यांनी नमूद केलं.
संतांचा वारसा
संत शेख महंमद महाराज हे श्रीगोंद्याचे ग्रामदैवत मानले जातात आणि त्यांच्यावर हिंदू आणि मुस्लिम समाजाची श्रद्धा आहे. “संतांनी हिंदू-मुस्लिम ऐक्याचा संदेश दिला. त्यांचा वारसा बदलण्याचा प्रयत्न आम्ही खपवून घेणार नाही,” असं शेलार यांनी सांगितलं. मंदिराच्या जीर्णोद्धाराला पाठिंबा देताना त्यांनी वक्फ बोर्डाची नोंदणी रद्द करण्याची मागणी लावून धरली आहे.
