अहिल्यानगरमध्ये व्यापारी दीपक लालसिंग परदेशी यांच्या अपहरण आणि हत्येच्या प्रकरणाने संपूर्ण शहरात खळबळ उडवली आहे. तोफखाना पोलिसांनी या प्रकरणातील आरोपींकडून एक पांढऱ्या रंगाची कार जप्त केली असून, या गुन्ह्यात आणखी काही लोकांचा सहभाग असण्याची शक्यता आहे. पोलिस अधिक तपास करत आहेत.
२४ फेब्रुवारी रोजी व्यापारी दीपक परदेशी यांचे अपहरण करण्यात आले होते. आरोपींनी त्यांना पांढऱ्या रंगाच्या कारमध्ये बसवून नेले आणि नायलॉनच्या दोरीने गळा आवळून त्यांची हत्या केली. मृतदेह नष्ट करण्याच्या उद्देशाने तो निंबळक बायपास चौकाजवळील सिमेंटच्या बंदिस्त नाल्यात टाकण्यात आला. तब्बल २२ दिवसांनंतर मृतदेह आढळून आला.
या प्रकरणात पोलिस विभागातील बडतर्फ कर्मचारी किरण कोळपे आणि सागर मोरे या दोघा आरोपींना अटक करण्यात आली आहे. पोलिसांच्या तपासानुसार, हे फक्त दोन आरोपी नसून गुन्ह्यात आणखी काही जण सहभागी असण्याची शक्यता आहे.मृतक दीपक परदेशी यांचे विळद येथील काही लोकांकडे मोठ्या प्रमाणात पैसे बाकी होते. ही रक्कम वसूल करण्यासाठी त्यांनी आरोपींना काम दिले होते. मात्र, आरोपींनी वसुली करण्याऐवजी कट रचून परदेशी यांची हत्या केली.
दीपक परदेशी यांच्या पार्थिवावर बुधवारी नालेगाव येथील अमरधाम स्मशानभूमीत अंत्यसंस्कार करण्यात आले. पोलिस आता जप्त केलेल्या कारच्या आधारे या प्रकरणातील अन्य संशयितांचा शोध घेत आहेत. या घटनेने व्यापारी वर्गात भीतीचे वातावरण निर्माण झाले असून, आरोपींवर कठोर कारवाई करण्याची मागणी करण्यात येत आहे.
