नेवासा- तालुक्यातील भानसहिवरा गावात मारुती तळे वस्तीवर एक धक्कादायक घटना घडली. २५ मार्चला रात्री ८:३० वाजता घरी कोणीही नसताना अचानक आग लागली आणि गॅस टाकीचा स्फोट झाला.
या घटनेत मोठं नुकसान झालं, ज्यामुळे ७७ वर्षीय द्वारकाबाई भणगे यांचा संसार उघड्यावर पडला. मोलमजुरी करून उदरनिर्वाह करणाऱ्या या वृद्ध महिलेची ही आपत्ती पाहून गावकऱ्यांनाही धक्का बसला आहे.
ही आग लागली तेव्हा घरात कोणीही नव्हतं. द्वारकाबाईंची मुलगी दूध आणायला बाहेर गेली होती, तर द्वारकाबाई स्वतः नेहमीप्रमाणे लग्न समारंभात आचारीच्या हाताखाली काम करण्यासाठी नगरला गेल्या होत्या.
अचानक लागलेल्या या आगीत गॅस टाकीचा स्फोट झाला आणि घरातलं सगळं जळून खाक झालं. मुलीसोबत मारुती तळे इथल्या पत्र्याच्या शेडमध्ये राहणाऱ्या द्वारकाबाईंचा मुलगा आणि सून नेवासा फाटा इथं मोलमजुरी करतात. या कुटुंबावर आता मोठं संकट कोसळलं आहे.
आगीत घरातलं सगळं सामान जळालं. कपड्यांपासून ते रोजच्या वापराच्या वस्तूंपर्यंत काहीच शिल्लक राहिलं नाही. दुसऱ्या दिवशी भानसहिवरा कामगार तलाठी आकाश जोशी यांनी घटनास्थळी जाऊन पंचनामा केला.
त्यांनी केलेल्या प्राथमिक अंदाजानुसार, या आगीत सुमारे ३ लाख २० हजार रुपयांचं नुकसान झालं आहे. ही घटना एका गरीब कुटुंबासाठी किती मोठा आघात आहे, हे यावरूनच लक्षात येतं.
या दुर्घटनेनंतर भाजप नेवासा तालुका सरचिटणीस लक्ष्मण मोहिटे यांनी शासनाकडे या कुटुंबाला जास्तीत जास्त भरपाई देण्याची मागणी केली आहे.
मोलमजुरीवर अवलंबून असलेल्या या कुटुंबाला आता पुन्हा उभं राहण्यासाठी मदतीची गरज आहे. आग कशी लागली याचं कारण अजून स्पष्ट झालेलं नाही, पण या कुटुंबाच्या नुकसानाची भरपाई होणं गरजेचं आहे, असं गावकऱ्यांचंही मत आहे. या घटनेने परिसरात हळहळ व्यक्त केली जातेय.
