अहिल्यानगर : शहरातील थकीत कर असलेल्या मालमत्ताधारकांना नोटीस देत कारवाई करणाऱ्या मनपालाच जलसंपदा विभागाने दणका दिला आहे. मुळा धरणातून शहरासाठी घेतल्या जाणाऱ्या बिगर सिंचनाच्या पाणीपट्टीपोटी महापालिकेकडे ११ कोटी ६३ लाख ७१ हजार ८३६ रुपये थकबाकी भरण्याबाबत वारंवार नोटीसा बजावूनही थकबाकी न भरल्याने जलसंपदा विभागाने शुक्रवारपर्यंत (१५ मार्च) अल्टिमेटम दिला असून त्यानंतर शहराचा पाणीपुरवठा खंडित करण्याचा इशारा दिला आहे.
मुळा पाटबंधारे विभागाच्या कार्यकारी अभियंता सायली पाटील यांनी महापालिकेला ही नोटीस बजावली आहे. अपेक्षित वसुली होत नसल्याने अडचणीत असलेल्या महापालिकेच्या अडचणीत या नोटीसीमुळे आणखी भर पडली आहे. सन २०२४-२५ या आर्थिक वर्षात अद्यापर्यंत महापालिकेने २१ लाख २० हजार ६५६ रुपये रक्कम पाणीपट्टीची जमा केली आहे. उर्वरित थकबाकी भरण्याबाबत महापालिकेला वारंवार लेखी सूचना करण्यात आल्या आहे. मात्र त्यांची महापालिकेने कोणतीही दखल घेतली नाही. थकबाकीची रक्कम वेळेत न भरल्यामुळे महापालिकेकडे अधिभाराची रक्कम वाढत आहे.
जलसंपदा विभागाने येत्या १० मार्चपर्यंत थकीत रक्कम भरण्यासाठी मुदत दिली होती. मात्र, आता १५ मार्चपर्यंत थकबाकी न भरल्यास कोणतीही पूर्व सूचना न देता कोणत्याही क्षणी पाणीपुरवठा खंडित करण्यात येईल व त्यामुळे उद्भवणाऱ्या जनक्षोभास महापालिका जबाबदार राहील, अशी नोटीस बजावण्यात आली आहे. महापालिकेने थकबाकी भरली नाही तर शहराचा पाणीपुरवठा खंडित होण्याची शक्यता आहे.
इतकी आहे थकबाकी
महापालिकेकडे जानेवारी अखेर पाणीपट्टी १० कोटी २४ लाख ६८ हजार २८३ रुपये, लोकल फंड १ कोटी २ लाख ६५ हजार १७५ रुपये, दंडनीय आकार २० लाख १७ हजार ८५३ रुपये, तर अधिभार १६ लाख २० हजार ५२३ रुपये अशी ११ कोटी ६३ लाख ७१ हजार ८३६ रुपये थकबाकी आहे.
