जामखेड: जामखेड नगर परिषदेकडे पाटबंधारे विभागाची गेल्या तीन वर्षांची ६८ लाख रुपयांची थकबाकी आहे. दीड महिन्यात तीन वेळा नोटिसा देऊनही ही रक्कम भरली गेली नाही. त्यामुळे १ एप्रिलपासून जामखेडचा पाणीपुरवठा बंद होणार आहे.
जामखेड शहराची तहान भागवण्यासाठी नगर परिषद दरवर्षी ४२ दशलक्ष घनफूट पाणी वापरते. पण नियमांचं पालन न केल्यामुळे त्यांना ५०० टक्के दंड आकारला जातोय.
सध्या शहराला आठवड्यातून एकदा पाणी मिळतंय. त्यामुळे मालमत्ता कराची थकबाकी भरण्यासाठी नागरिक पुढे येत नाहीत. वसुलीचं प्रमाण कमी असल्याने नगर परिषद आर्थिक अडचणीत आहे. आता पाटबंधाऱ्याने पाणीपुरवठा बंद करण्याचा निर्णय घेतल्याने जामखेडकरांवर पाणीटंचाईचं संकट आहे.
शहराला भुतवडा तलावातून ६६ टक्के पिण्याचं पाणी मिळतं. २५ वर्षांपूर्वी रोज पाणीपुरवठा व्हायचा, पण आता लोकसंख्या आणि शहराचा विस्तार वाढल्याने तलाव पूर्ण भरला तरी आठ दिवसाआडच पाणी मिळतं.
उन्हाळ्याच्या कडक तापमानात पिण्याच्या पाण्यासाठी लोक दररोज २० लिटरचे जार विकत घेतात. पण प्रत्येकाला हे परवडत नाही. त्यामुळे अनेक कुटुंबांना नगर परिषदेच्या पाण्यावरच अवलंबून राहावं लागतं.
नगर परिषदेची स्थापना झाल्यापासून पाटबंधारे विभागाशी पाणीपुरवठ्याचा करार झालेला नाही. प्रदूषण मंडळाची परवानगी नाही, वॉटर मीटर नाहीत, आणि पाणीपट्टी वेळेवर भरली जात नाही.
त्यामुळे विलंब शुल्क वाढतंय आणि नगर परिषदेला ५०० टक्के दंड भरावा लागतोय. पाटबंधाऱ्याच्या मते, भुतवडा तलावातून होणारा पाण्याचा उपसा बेकायदा आहे.
नगर परिषदेची मालमत्ताधारकांकडे कोट्यवधींची थकबाकी आहे. यासाठी वेळोवेळी आवाहनं केली गेली, थकबाकीदारांची नावं बॅनरवर लावली गेली. “पुढच्या दोन-तीन दिवसांत थकबाकी भरली जाईल. याबाबत पाटबंधाऱ्याच्या कार्यकारी अभियंत्यांशी बोलणं झालंय,” असं मुख्याधिकारी अजय साळवे यांनी सांगितलं.
पाटबंधारे विभाग गेल्या कित्येक वर्षांपासून नगर परिषदेकडे नियमांचं पालन करण्यासाठी पाठपुरावा करतोय. पण त्याकडे दुर्लक्ष झालंय. २०२२ पासून थकबाकी भरली गेली नाही. ६८ लाख १९ हजार ७४८ रुपये थकीत आहेत. “३१ मार्चपर्यंत पैसे न भरल्यास पाणीपुरवठा बंद होईल,” असं उपअभियंता उमेश कंगणकर यांनी स्पष्ट केलं.
