१७ मार्च २०२५ रोजी केडगावातील बायपास चौकाच्या जवळील कांबळे वस्ती येथे शनिवारी रात्री बिबट्याचे दर्शन झाले. सलीम रंगरेज यांच्या शेतात हा बिबट्या दिसल्याने नागरिकांमध्ये भीतीचे वातावरण निर्माण झाले. या घटनेनंतर वन विभागाने तातडीने पावले उचलून रविवारी सायंकाळी बिबट्याला पकडण्यासाठी पिंजरा लावला.
बिबट्याच्या अस्तित्वाची खात्री करण्यासाठी वनपरिक्षेत्र अधिकारी अविनाश तेलोरे यांच्या मार्गदर्शनाखाली वन विभागाच्या कर्मचाऱ्यांनी पाहणी केली. काही नागरिकांनी बिबट्याचा व्हिडीओ शूट केला होता, तसेच या परिसरात बिबट्याच्या पावलांचे ठसे आढळून आले. याशिवाय, दोन दिवसांपूर्वीच बिबट्याने एका कालवडीची शिकार केल्याची नोंद झाली आहे.
रविवारी सकाळीवन्यजीव रक्षक आणि व्याघ्र संरक्षण समितीचे सदस्य मंदार साबळे, वनरक्षक विजय चेमटे, चालक संदीप ठोंबरे आणि अॅड. हर्षद कटारिया यांनी घटनास्थळी भेट दिली. त्यांनी परिस्थितीची पाहणी करून नागरिकांना सुरक्षिततेसाठी काही सूचना दिल्या.
केडगाव परिसरात यापूर्वीही बिबट्याचे अस्तित्व आढळले आहे. त्यामुळे नागरिकांनी घाबरून न जाता सावधगिरी बाळगावी. तसेच, खोट्या भीती आणि गैरसमज पसरवणाऱ्या व्हिडीओ क्लिप्स सोशल मीडियावर प्रसारित करू नयेत, असे आवाहन वनपरिक्षेत्र अधिकारी अविनाश तेलोरे आणि मंदार साबळे यांनी केले आहे.
सध्या वन विभागाच्या विशेष पथकाने बिबट्याला सुरक्षितपणे पकडण्यासाठी उपाययोजना केल्या आहेत. लावण्यात आलेल्या पिंजऱ्यामुळे लवकरच बिबट्याला पकडण्यात यश येईल, अशी अपेक्षा आहे. तोपर्यंत नागरिकांनी रात्रीच्या वेळी एकटे फिरणे टाळावे आणि वन विभागाने दिलेल्या सूचनांचे पालन करा.
