कोकणात प्रसिद्ध असलेली काळी मिरी आता अकोले तालुक्यातही यशस्वीपणे पिकली आहे. म्हाळादेवी गावात रामलाल हासे या सेवानिवृत्त शिक्षकाने केलेल्या एका वेगळ्या प्रयोगातून हे सिद्ध झालंय. त्यांच्या दोन वेलींवरून तब्बल दहा किलो ओली काळी मिरी मिळाली आहे. हा प्रयोग पाहून अकोलेतही काळी मिरीचं पीक घेता येऊ शकतं, यावर विश्वास बसतो.
तीन वर्षांपूर्वी रामलाल हासे यांनी आपल्या गावातल्या आंब्याच्या बागेत मोकळ्या जागेचा उपयोग करत काळ्या मिरीची आठ रोपं लावली. मसाल्यांमध्ये राणी म्हणून ओळखली जाणारी ही काळी मिरी त्यांना आपल्या गावात पिकवायची होती. सुरुवातीला दोन रोपं गेली, पण बाकीची सहा रोपं चांगलीच वाढली. मागच्या वर्षी या सहा वेलींवरून त्यांना पाच किलो मिरी मिळाली होती. पण या वर्षी तर कमालच झाली. सहा वेलींना मिरी लगडली आणि त्यातल्या फक्त दोन वेलींवरून दहा किलो ओली मिरी निघाली. यावरून हासे म्हणतात, “अकोलेतही काळी मिरीचं पीक घेणं शक्य आहे.”
हासे यांनी या प्रयोगात काही खास गोष्टी केल्या. त्यांनी या वेलींसाठी कोणतीही रासायनिक खते किंवा औषधांची फवारणी वापरली नाही. म्हणजे हा सगळा खर्च शून्य राहिला आणि त्यांना पूर्णपणे सेंद्रिय, विषमुक्त मिरी मिळाली. आता ही ओली मिरी ते वाळवणार आहेत. वाळल्यानंतर तिच्या १० ते २० ग्रॅमच्या छोट्या पुड्या बनवणार आहेत. पण या मिरीची विक्री करण्याचा त्यांचा विचार नाही. “ही मिरी मी मित्रांना, नातेवाइकांना आणि घरी येणाऱ्या पाहुण्यांना भेट म्हणून देणार आहे,” असं ते सांगतात.
हासे यांचा हा प्रयोग अकोलेसारख्या भागात काळी मिरी पिकवण्याची शक्यता दाखवतो. आतापर्यंत फक्त दोन वेलींची फळं तोडली आहेत, बाकी चार वेलींची तोडणी अजून बाकी आहे. त्यामुळे आणखी किती उत्पन्न मिळेल, याची उत्सुकता आहे. त्यांनी कमी खर्चात आणि नैसर्गिक पद्धतीने हे यश मिळवून दाखवलं, हे खरंच कौतुकास्पद आहे.
