अहिल्यानगरातून एक महत्त्वाची बातमी समोर आली आहे. महाराष्ट्र राज्य मार्ग परिवहन महामंडळाने आपल्या चालक आणि वाहकांसाठी गणवेश, नेमप्लेट आणि बिल्ला घालणं अनिवार्य केलंय. जर कोणी कर्मचारी तपासणीच्या वेळी गणवेशाशिवाय दिसला, तर त्याला दंड भरावा लागणार आहे. हा नियम लागू करून कर्मचाऱ्यांमध्ये शिस्त आणण्याचा प्रयत्न सुरू झालाय.
एसटीच्या चालक आणि वाहकांना कामावर असताना मोटार वाहन कायद्यानुसार गणवेश घालणं बंधनकारक आहे. पण काही कर्मचारी या नियमाला फारसं गांभीर्यानं घेत नाहीत. ते कामावर येताना गणवेश घालतच नाहीत. त्यामुळे आता प्रशासनाने कडक पाऊल उचललं आहे. गणवेशाबरोबरच बिल्ला आणि नेमप्लेट घालणंही गरजेचं आहे. यामुळे प्रवाशांना कर्मचाऱ्यांची ओळख पटणं सोपं होतं. एसटी प्रशासनाकडून सांगण्यात आलं की, बहुतांश आगारांमधले चालक आणि वाहक हे नियम पाळतात. पण काही ठिकाणी याकडे दुर्लक्ष होतं, म्हणूनच आता दंडाची तरतूद लागू करण्यात आली आहे.
या नियमाची कडक अंमलबजावणी व्हावी म्हणून आगार व्यवस्थापकांना स्पष्ट सूचना देण्यात आल्या आहेत. प्रत्येक चालक आणि वाहकाने स्वच्छ गणवेश घालावा आणि त्यावर बिल्ला तसंच नेमप्लेट असावी, असं सांगितलं गेलंय. विभाग नियंत्रक कार्यालयातून मिळालेल्या माहितीनुसार, या सूचना सर्व आगारांपर्यंत पोहोचवल्या गेल्या आहेत. याचा उद्देश एवढाच आहे की, प्रवाशांना कर्मचाऱ्यांची माहिती सहज मिळावी आणि सेवेतही सुसंगती राहावी. गणवेशामुळे कर्मचाऱ्यांमध्ये एकप्रकारचा विश्वास आणि ओळख निर्माण होते, असंही प्रशासनाचं म्हणणं आहे.
अहिल्यानगरचे विभाग नियंत्रक राजेंद्र जगताप यांनी याबाबत बोलताना सांगितलं, “चालक आणि वाहकांना कामावर असताना गणवेश, बिल्ला आणि नेमप्लेट घालून येण्याच्या सूचना दिल्या आहेत. बहुतांश ठिकाणी या नियमाचं पालन होतंय. पण जर कोणी उल्लंघन केलं, तर त्यांच्यावर दंडाची कारवाई होईल.” हा नियम प्रवाशांच्या सोयीबरोबरच कर्मचाऱ्यांवर जबाबदारी निश्चित करण्यासाठीही आहे. आता हा नियम किती प्रभावीपणे राबवला जाईल, हे पाहणं महत्त्वाचं ठरणार आहे.
