साईभक्तांची गैरसोय
१ एप्रिलपासून एसटी महामंडळाने कोणतीही पूर्वसूचना न देता शिर्डी-हैदराबाद ही एकमेव बस सेवा बंद केली होती. त्यामुळे साईभक्तांसह अहिल्यानगर व परिसरातील प्रवाशांना मोठ्या गैरसोयींचा सामना करावा लागला. या निर्णयामुळे प्रवाशांमध्ये संताप निर्माण झाला होता.
सेवा पुन्हा सुरू
नागरिकांनी हा प्रश्न उचलून धरला. यानंतर एसटी महामंडळाने ८ एप्रिलपासून ही बस सेवा पुन्हा सुरू करण्याचा निर्णय घेतला आहे. कोपरगाव आगारातून ही गाडी पुन्हा नियमितपणे धावणार असून, अहिल्यानगर बसस्थानकावर सेवा सुरू होणार असल्याचा फलकही लावण्यात आला आहे.
साईभक्तांपासून ते स्थानिक प्रवाशांसाठी सेवा
दक्षिण भारतातून लाखो साईभक्त शिर्डीला येत असतात. याशिवाय, अहिल्यानगर, जामखेड, तुळजापूर या भागातील नागरिकांचे नातेवाईक हैदराबादला असतात, त्यामुळे या मार्गावर प्रवाशांची संख्या मोठी आहे. ही सेवा दररोज सायंकाळी ५ वाजता शिर्डीहून सुरु होऊन, रात्री साडेसातपर्यंत अहिल्यानगर गाठते आणि दुसऱ्या दिवशी सकाळी ९ वाजता हैदराबादमध्ये पोहोचते.
बस नादुरुस्त झाल्यानंतर कोपरगाव आगाराने सेवा थांबवली होती, मात्र बिघाड दुरुस्त करून पुन्हा गाडी सुरू करणे अपेक्षित होते. सेवा बंद झाल्यानंतर प्रवाशांनी एसटीवर रोष व्यक्त करत आंदोलनाचा इशारा दिला. यानंतर प्रकरण दैनंदिन माध्यमांतून गाजले आणि प्रशासनाला सेवा पुनरुज्जीवित करावी लागली.
प्रवाशांमध्ये समाधान
एसटीचे विभाग नियंत्रक राजेंद्र जगताप यांनी कोपरगाव आगाराला गाडी पूर्ववत सुरू करण्याच्या सूचना दिल्या. सध्या सुरू होणारी गाडी स्लीपर कोच असून, ती नियमितपणे सुरू ठेवावी अशी प्रवाशांची मागणी आहे. नवीन गाड्या स्लीपर नसल्यामुळे ही गाडी अन्य मार्गांवर वळवू नये, असा स्पष्ट आदेश प्रशासनाने दिला आहे.
प्रवाशांसाठी दिलासा
ही बस सेवा साईभक्तांसाठी तर आवश्यक आहेच, पण जामखेड, तुळजापूर, अहिल्यानगर येथील प्रवाशांना ही महत्त्वाची सुविधा आहे. ही सेवा सतत सुरू ठेवण्याची प्रवाशांची अपेक्षा असून, ही गाडी इतर मार्गांसाठी वापरू नये, असेही आवाहन करण्यात आले आहे.
“गाडी सुरू ठेवण्यात येईल, इतर मार्गांवर न पाठवण्याच्या सूचना दिल्या आहेत.”
– राजेंद्र जगताप, विभाग नियंत्रक, एस.टी., अहिल्यानगर
