Ahmednagar News : कोपरगाव शहरातून वाहणाऱ्या गोदावरी नदीवरील लहान पुलावरून एका शालेय विद्यार्थिनीने सोमवारी संध्याकाळी साडेपाच वाजेच्या सुमारास नदीपात्रात उडी मारली. पुलावरून जाणाऱ्यांच्या ही बाब लक्षात आल्यावर त्यांनी तेथे गर्दी केली.
दरम्यान, शहरातील आपदा मित्र असलेल्या तरुणांना ही बाब कळताच जवळच असलेले युवक दिपक थोरात, सोमनाथ आहेर, संतोष वायदंडे, संजय जगधने, किरण सिनगर, विजू मरसाळे आणि सुषमा खिलारी हे त्याठिकाणी पोहोचले. यातील काही जणांनी वाहत्या पाण्यात उडी मारून पुलापसून काही अंतरावर वाहून जात असताना सदर मुलीला पकडले आणि पाण्याबाहेर काढत तिचे प्राण वाचवले.
अचानक पुलावर गर्दी झाल्याने शहर पोलीस ठाण्याचे पोलीस कर्मचारी सुशील शिंदे तसेच शिर्डी पोलीस स्टेशनचे कर्मचारी रामेश्वर वेताळ हे पुलावरून जात असताना ते देखील मदतीसाठी नदीपात्रात उतरले. या तरुणांच्या सतर्कतेने सदर शालेय विद्यार्थिनीचे प्राण वाचले आहे. तरुणांच्या या धाडसामुळे मुलीचे प्राण वाचल्याने नागरिकांकडून या तरुणांवर अभिनंदनाचा वर्षाव होत आहे.
याबाबत मिळालेल्या माहितीनुसार, कोपरगाव शहरात राहणारी दहावीत दहावीत शिक्षण घेत असलेली विद्यार्थिनी तासिकासाठी शहरात आली. तासिका संपल्यानंतर तिने गोदावरी नदीच्या लहान पुलावरून पाणी पात्रात उडी मारली. सध्या नदी दुथडी भरून वाहत असल्याने ती पाण्यात वाहून जात होती. मात्र आपदा मित्र असलेल्या जिगरबाज युवकांनी क्षणाचाही विचार न करता नदीत उतरून त्या मुलीला बाहेर काढले.
दरम्यान, मुलीला पाण्याबाहेर काढल्यानंतर ती सतत रडत होती आणि घाबरलेली होती. यावेळी पुलावर बघ्यांची मोठी गर्दी जमली होती. तरुणीला पाण्याबाहेर काढल्यानंतर संबंधित मुलीचे वडील आणि मामा त्या ठिकाणी आले असता, पोलिसांनी तिला त्यांच्या ताब्यात दिले. मुलीने नेमकी नदीत उडी का मारली, याचे कारण मात्र समजू शकले नसल्याचे पोलिसांनी सांगितले.
