Shirdi News : शिर्डी नगरपरिषदेचे मुख्याधिकारी सतीश दिघे यांच्या नेतृत्वाखालील प्रशासकीय कार्यपद्धती राज्यभर चर्चेचा विषय बनली आहे. त्यांनी शिर्डीच्या नागरी व्यवस्थापनात केलेले नावीन्यपूर्ण प्रयोग आणि प्रभावी निर्णय प्रक्रिया अनेक नगरपरिषदा व महापालिकांसाठी मार्गदर्शक ठरत आहे. त्यांच्या कामाची दखल घेण्यासाठी राज्यभरातील नगरपरिषद अधिकारी शिर्डीला भेट देत आहेत. दिघे यांचा ‘विकास पॅटर्न’ संपूर्ण महाराष्ट्रात एक नवा आदर्श म्हणून ओळखला जाऊ लागला आहे.
शिर्डीच्या बदलाचा प्रवास
संगमनेर जवळील जोर्वे येथे जन्मलेले सतीश दिघे यांनी आपल्या जिद्दीच्या जोरावर प्रशासकीय सेवेत मोठे स्थान मिळवले. २०१७ ते २०२० या पहिल्या कार्यकाळात त्यांनी कचरा व्यवस्थापन, पाणीपुरवठा, ड्रेनेज सिस्टीम आणि वृक्षारोपण यासारखे महत्त्वाचे उपक्रम राबवले. त्यांच्या या नवकल्पनांमुळे शिर्डीने स्वच्छता व वसुंधरा अभियानात उल्लेखनीय कामगिरी केली आणि अनेक राष्ट्रीय पुरस्कार मिळवले. त्याचबरोबर पंतप्रधान नरेंद्र मोदी यांनीही त्यांच्या पाणीपुरवठा योजनेच्या कार्याचे कौतुक केले होते.
विकासाच्या दिशेने झेप
२०२३ मध्ये पालकमंत्री राधाकृष्ण विखे पाटील यांच्या पुढाकाराने दिघे यांची पुन्हा शिर्डीत नियुक्ती झाली, आणि शहराच्या विकासाला आणखी गती मिळाली. त्यांच्या कार्यकाळात साई पालखी गार्डन, वृंदावन गार्डन आणि अग्निशमन केंद्र यांसारखे महत्त्वाचे प्रकल्प पूर्ण झाले. तसेच, रस्त्यांचे काँक्रीटीकरण, ओपन स्पेस विकसित करून बागांची निर्मिती, सांडपाणी शुद्धीकरण प्रकल्प, कचऱ्यापासून खतनिर्मिती, सौरऊर्जा प्रकल्प आणि पुराच्या पाण्याचा प्रभावी निचरा करण्यासाठी राबवलेली कामे संपूर्ण राज्यासाठी एक दिशादर्शक उदाहरण ठरली.
शिस्तबद्ध कार्यसंस्कृती
सतीश दिघे यांच्या प्रशासकीय कार्यपद्धतीचा सर्वांत मोठा विशेष म्हणजे त्यांच्या कामाची गुणवत्ता आणि शिस्तबद्ध प्रणाली. ते स्वतः प्रत्येक कामाच्या ठिकाणी जाऊन पाहणी करतात आणि गुणवत्तेशी कोणतीही तडजोड करत नाहीत. कामात दिरंगाई करणाऱ्या कर्मचाऱ्यांवर कठोर कारवाई केली जाते, तर उत्कृष्ट कामगिरी करणाऱ्यांना प्रोत्साहन दिले जाते. यामुळे नगरपरिषदेतील कामकाज अधिक कार्यक्षम आणि पारदर्शक बनले आहे.
स्मार्ट प्रशासन
शहरातील सर्व महत्त्वाच्या विभागांसाठी स्वतंत्र व्हॉट्सअॅप ग्रुप तयार करण्यात आले आहेत, ज्यावर कर्मचारी आपली कामाची वेळ, लोकेशनसह फोटो आणि व्हिडिओच्या स्वरूपात अपडेट करतात. नागरिकांच्या तक्रारींचे जलद निराकरण करण्यावर त्यांचा कटाक्ष असतो. भविष्यात, शहरातील कचरा विकत घेऊन त्यावर प्रक्रिया करण्याची योजना आखली जात आहे.
विकासाचे स्मार्ट मॉडेल
सतीश दिघे यांच्या कार्यकाळात शिर्डी शहर नागरी व्यवस्थापनाचा एक उत्कृष्ट मॉडेल बनले आहे. त्यांच्या कल्पक दृष्टिकोनामुळे शिर्डीच्या विकासाची गती वाढली असून नव्या तंत्रज्ञानाचा प्रभावी वापर, पारदर्शक प्रशासन आणि नागरिक-केंद्रित उपक्रमांच्या जोरावर शिर्डी राज्यभर चर्चेचा विषय ठरत आहे. त्यांच्या नेतृत्वाखाली शहर विकासाचा हा नवा ‘पॅटर्न’ भविष्यात इतर नगरपरिषदांसाठी आदर्श ठरेल, यात शंका नाही.
