Ahmednagar News : नगर- पाथर्डी रस्त्यावरील करंजीतील अपूर्वा पेट्रोल पंपाजवळ बुधवारी दुपारी तीन वाजण्याच्या सुमारास एसटी बस आणि मोटारसायकल यांची समोरासमोर धडक होऊन झालेल्या अपघातात मोटारसायकलस्वार भारत लक्ष्मण पागिरे रा. आगडगाव, ता. नगर हे जागीच ठार झाले. मयत भारत पागिरे माजी सैनिक आहेत.
बुधवारी दुपारी भारत पागिरे हल्ली रा. भिंगार हे करंजी येथून कासारवाडी, कासार पिंपळगाव येथे नातेवाईकांकडे गेले होते तेथून परत करंजीकडे येत असताना करंजी गावाजवळील अपूर्व पेट्रोलपंपासमोर भिवंडी -गेवराई या गेवराई डेपोच्या एसटी बसची आणि पागिरे यांच्या मोटारसायकलची समोरासमोर धडक झाली.
या अपघातात पागिरे यांचा जागीच मृत्यू झाला. घटनेनंतर एसटी बस चालक तिथून पसार झाला. अपघाताची माहिती समजताच महामार्ग पोलीस पथक तसेच करंजी आऊट पोस्टचे हवालदार हरिभाऊ दळवी व लाड हे घटनास्थळी दाखल झाले व पागिरे यांचा मृतदेह शवविच्छेदनासाठी पाथर्डीला रवाना केला.
डेडबॉडीचे फोटो काढण्यासाठी चढाओढ
माजी सैनिकाचा अपघात झाल्यानंतर त्यांच्या बुलेट गाडीचा व शरीराचा अक्षरशः चंदामेंदा झाला होता, एवढी गंभीर घटना घडलेली असतानादेखील या डेडबॉडीचे मोबाईलमध्ये फोटो काढून ते सोशलमीडियावर व्हायरल करण्यासाठी अनेकांची चढाओढ दिसून आली. अर्धा तास रस्त्याच्या कडेला पडलेल्या मृतदेहावर कोणीही कपडा टाकण्यापूर्ती देखील माणुसकी दाखवली नाही.
