Ahmednagar News : तलाठ्याने पकडलेली वाळूने भरलेली पिकप काही वाळू तस्करांनी या तलाठ्याला दमदाटी करून पळून नेल्याची घटना दि. २७ मार्च रोजी दुपारी पावणे दोन वाजेच्या सुमारास संगमनेर खुर्द परिसरात घडली. याप्रकरणी तीन जणांविरुद्ध गुन्हा दाखल करण्यात आला आहे.
याबाबत समजलेली अधिक माहिती अशी की, कामगार तलाठी संग्राम बाळासाहेब देशमुख हे त्यांच्या पथकासह संगमनेर खुर्द परिसरात गस्त करीत असताना त्यांनी तलाठी कार्यालयाकडून प्रवरा नदीकडे जाणा-या रस्त्यावर वाळूने भरलेली एक पिकअप पकडली.
यावेळी उपस्थित असलेल्या वाळू चोरांनी शासकीय कामात अडथळा आणून चोरीची वाळूने भरलेली विना नंबरची पिकअप पळवून नेली.
याबाबत कामगार तलाठी संग्राम देशमुख यांनी शहर पोलीस ठाण्यात फिर्याद दिली. या फिर्यादीवरून पोलिसांनी पिकअप वाहन चालक, दुचाकीवरील चालक कैफ पुर्ण नांव व पत्ता माहीत नाही. मोटार सायकलवरील नफीस यांचे पुर्णनांव व पत्ता माहीत नाही.
या तीन जणांविरुद्ध गु.र.नं.२८८/२०२४ भा.द.वि. कलम ३५३,३३२,३७९,३४ प्रमाणे गुन्हा दाखल करण्यात आला आहे. पुढील तपास पोलीस उपनिरीक्षक पवार हे करीत आहे.
