Ahmednagar News : नगर तालुक्यातील इमामपूर घाटात ओहरटेकच्या नादात भीषण अपघात झाला. या अपघातामध्ये शनिशिंगणापूर देवस्थानच्या पुजाऱ्याचा मृत्यू झाला. श्रीकांत मधुकर जोशी (वय ५०, रा. भिस्तबाग चौक, पाइपलाइन रोड, नगर) असे मृत पुजाऱ्याचे नाव आहे. ते नगरहून शनिशिंगणापूरला निघाले असताना हा अपघात घडला.
अधिक माहिती अशी : श्रीकांत मधुकर जोशी हे मूळचे सोनई (ता. नेवासा) येथील रहिवासी होते. परंतु मुलांच्या शिक्षणासाठी नगरमध्ये वास्तव्यास आलेले होते. शनिवारी (दि.२५) पहाटे ते मोटारसायकलवरून शनिदेवाच्या पूजेसाठी शिंगणापूकडे चालले असताना इमामपूर घाटात ते आले असता
ओव्हरटेक करण्याच्या प्रयत्नात दोन वाहने भरधाव वेगाने समोरून आली. त्यांची जोशी यांच्या मोटारसायकलशी जोरदार धडक झाली. या अपघातात ते जखमी झाले होते. त्यांच्या मुलाने अथर्व याने त्यांना नगरच्या जिल्हा रुग्णालयात उपचारासाठी आणले.
परंतु उपचारापूर्वीच त्यांचा मृत्यू झालेला होता. एमआयडीसी पोलिसांनी आकस्मिक मृत्यूची नोंद केली असून, पुढील तपास पोलीस करत आहेत. या घटनेने परिसरात शोककळा पसरली आहे.
