राहुरी शहरातील बुवासिंध बाबा व्यायामशाळा तालीम मध्ये असलेल्या छत्रपती शिवाजी महाराजांच्या अर्ध्याकृती पुतळ्याच्या चेहऱ्याला अज्ञात समाजकंटकांने काळे रंग लावून तसेच जिरेटोपाची देखील तोडफोड करत विटंबना केली.
ही घटना बुधवारी (दि.२६) दुपारी एक वाजण्याच्या दरम्यान उघडकीस आली आहे. शिवप्रेमींनी तालिम बाहेर मोठी गर्दी केली. चार तास नगर मनमाड महामार्गावर रास्तारोको करण्यात आला. नागरिकांमध्ये संतापाची लाट उसळली आहे.
स्थानिक नागरिक आणि तरुणांनी तालमीभोवती गर्दी केली. या घटनेने संतप्त झालेल्या नागरिकांनी आरोपींना तातडीने अटक करून त्यांच्यावर कठोर कारवाई करण्याची मागणी केली आहे.
घटनेची माहिती पोलिसांना समजतात घटनास्थळी श्रीरामपूर उपविभागीय पोलिस अधिकारी डॉ. बसवराज शिवपुजे, राहुरी पोलीस निरीक्षक संजय ठेंगे यांच्यासह पोलीस पथक दाखल झाले आहे.
घटनास्थळी आक्रमक शिवभक्तांचा मोठा जमाव जमला असून त्यांनी नगर-मनमाड महामार्ग रोखून धरत जोरदार घोषणाबाजी करत निषेध केला आहे. घटनास्थळी मोठ्या प्रमाणात शिवभक्त जमा झाले असून जोरदार घोषणाबाजी देखील करण्यात आली आहे.
या घटनेमुळे शिवप्रेमींतून मोठा संताप व्यक्त होत आहे. शिवप्रेमींनी नगर मनमाड महामार्गावर गेल्या तीन तासा पासुन रास्तारोको आंदोलन सुरु आहे.आंदोलन आ.शिवाजीराव कर्डीले, अरुणराव तनपुरे यांच्यासह विविध पक्षातील नेते यावेळी दाखल झाले आहे.
यावेळी २४ तासात आरोपींना अटक न केल्यास जिल्हा बंद करण्याचा इशारा यावेळी देण्यात आला आहे. राहुरी शहरात पोलीस बंदोबस्त वाढवण्यात आला आहे. अप्पर पोलीस अधीक्षक डॉ. बसवराज शिवपुजे आणि राहुरीचे पोलीस निरीक्षक संजय ठेंगे यांनी घटनास्थळी भेट देऊन परिस्थितीवर लक्ष ठेवून आहेत.
