२८ फेब्रुवारी २०२५ अहिल्यानगर : जादा परताव्याचे आमिष दाखऊन कोट्यवधी रुपयांच्या ठेवी गोळा करुन त्या ठेवी व त्यावरील परतावा न देता सर्व शाखा बंद करुन ठेवीदारांची कोट्यावधींची फसवणूक केल्याच्या प्रकरणात ‘ध्येय मल्टीस्टेट’चा व्हाईस चेअरमन रोहिदास सत्यदेव कवडे (रा. गुलमोहोर रस्ता, सावेडी) याला तोफखाना पोलिसांनी अखेर ९ महिन्यांनंतर बेड्या ठोकल्या त्याला मुंबईतील बदलापूर येथून बुधवारी (दि. २६) रात्री ताब्यात घेण्यात आले आहे.
नगर शहरासह जिल्ह्यात ‘ध्येय मल्टीस्टेट’च्या अनेक शाखा सुरु करण्यात आल्या होत्या. या शाखांमधून ठेवीदारांना ज्यादा परताव्याचे आमिष दाखवत कोट्यावधी रुपयांच्या ठेवी गोळा करण्यात आल्या होत्या. मात्र, या ठेवी व त्यावरील परतावा न देता ‘ध्येय मल्टीस्टेट’च्या सर्व शाखा बंद करण्यात आल्या होत्या.
त्यामुळे ठेवीदारांमध्ये एकच खळबळ उडाली होती. ‘ध्येय मल्टीस्टेट’ने ११२ ठेवीदारांचे ५ कोटी ७८ लाख ६५ हजार रुपयांचा अपहार केल्याचे समोर आले होते.या प्रकरणी ठेवीदार सुजाता संदीप नेवसे (रा. शिंदे मळा, सावेडी) यांनी दिलेल्या फिर्यादीवरून पतसंस्थेचा चेअरमन विशाल लक्ष्मण भागानगरे (रा. पंचपीर चावडी, माळीवाडा), व्हा. चेअरमन रोहिदास सत्यदेव कवडे (रा. गुलमोहोर रस्ता, सावेडी), संचालक व सीईओ राहुल बबन कराळे (रा. टोकेवाडी, ता. नगर) यांच्या सह ४ संचालक अशा ७ जणांविरूध्द तोफखाना पोलिस ठाण्यात १६ मे २०२४ रोजी फसवणूक, महाराष्ट्र ठेवीदार संरक्षण कायद्यानुसार (एमपीआयडी) गुन्हा दाखल करण्यात आला होता.
गुन्हा दाखल झाल्यापासून गेल्या ९ महिन्यापासून सर्व आरोपी फरार होते. यातील २ संचालकांना न्यायालयाने अटकपूर्व जामिन मंजूर केलेला आहे. तर इतर ५ जण मोकाट होते.त्यामुळे ठेवीदारांमध्ये पोलिस तपासाबाबत तीव्र नाराजी पसरलेली होती.ठेवीदारांनी अनेकवेळा तोफखाना पोलिसांसह अतिरिक्त पोलिस अधिक्षक प्रशांत खैरे यांना भेटून या आरोपींना अटक करण्याबाबत निवेदने दिली होती.अखेर ९ महिन्यानंतर यातील एका आरोपीला पकडण्यात पोलिसांना यश आले आहे.
कवडेकडून मिळू शकते महत्वाची माहिती ध्येय मल्टिस्टेटमधील घोटाळ्याप्रकरणी गुन्हा दाखल झाल्यानंतर सर्व आरोपी पसार झाले होते. त्यामुळे पोलिसांचा तपासही रखडला होता. अखेर या गुन्ह्यात ध्येय मल्टिस्टेटचा व्हाईस चेअरमन रोहिदास कवडे हा महत्वाचा आरोपी पोलिसांच्या हाती लागल्याने त्याच्याकडून महत्वाची माहिती मिळू शकते. तसेच या प्रकरणाचा तपासही पुढे जाऊ शकतो व इतर आरोपींच्या अटकेचा मार्गही प्रशस्त होऊ शकतो, अशी अशा ठेवीदारांना आहे.
भाड्याच्या खोलीतून पोलिस कोठडीत
या गुन्ह्यातील आरोपी रोहिदास कवडे हा मुंबईतील बदलापूर येथे भाड्याने खोली घेवून राहत असल्याची माहिती तोफखाना पोलिस ठाण्याचे पोलिस निरीक्षक व तपासी अधिकारी आनंद कोकरे यांना मिळाली होती. त्यांनी पोलिस अंमलदार दत्तात्रय जपे, सुधीर खाडे, योगेश चव्हाण, बाळासाहेब भापसे, सुनिल शिरसाठ यांचे पथक त्याला पकडण्यासाठी पाठवले.
या पथकाने बदलापूर येथे जावून बुधवारी रात्री ताब्यात घेऊन त्याला पहाटे नगरमध्ये आणण्यात आले आहे. आरोपी कवडे याला दुपारी उशिरा न्यायालयात हजर करण्यात आले असता न्यायालयाने त्याला ३ मार्च पर्यंत पोलिस कोठडी सुनावली आहे.
