अहिल्यानगर- नगर शहरातील लालटाकी रस्त्यावरील एक अत्यंत परिचित आणि भावनिकदृष्ट्या जुळलेला चौक म्हणजे ‘अप्पू हत्ती चौक’. गेली ४३ वर्षे या चौकाने नगरकरांच्या मनात एक खास स्थान मिळवले होते आणि त्याचे श्रेय जाते त्या चौकात उभारलेल्या हत्तीच्या पिल्लाच्या शिल्पाला. एका पायाने फुटबॉल मारणाऱ्या, १९८२ च्या आशियाई क्रीडा स्पर्धेच्या शुभंकर असलेल्या ‘अप्पू’ला.
रस्ता रुंदीकरणामुळे निर्णय
रस्ता रुंदीकरण आणि चौकात भव्य सर्कल उभारण्याच्या कामांतर्गत आता महापालिका प्रशासनाने ‘अप्पू हत्ती’चे शिल्प काढून टाकले आहे. त्याच्या जागी आता घोड्याचे भव्य शिल्प उभारले जाणार आहे. ही कलात्मक अदलाबदल शहराच्या सौंदर्यात भर घालणारी असली, तरीही नगरकरांच्या भावविश्वातून ‘अप्पू’ सहजासहजी पुसला जाणार नाही.
आठवणींचा संग्रह
१९८२ मध्ये भारतात पार पडलेल्या आशियाई क्रीडा स्पर्धांचे बोधचिन्ह म्हणजेच ‘अप्पू’. याच हत्तीच्या पिल्लाचे शिल्प नगरमध्ये उभारण्यात आले आणि ते लवकरच परिसराच्या ओळखीचे एक अविभाज्य प्रतीक बनले. व्यावसायिक पत्त्यांपासून ते शाळकरी मुलांच्या भेटीपर्यंत, या चौकाचे नाव कायम ‘अप्पू हत्ती चौक’ असेच राहिले. त्यामुळे हे फक्त चौक नव्हते, तर आठवणींचा एक संग्रह होता.
नवे शिल्प
महापालिका प्रशासनाने चौकात भव्य सर्कल तयार करण्याचा निर्णय घेतला आहे. या सर्कलमध्ये आकर्षक घोड्याचे शिल्प उभे राहणार आहे. शहराच्या सौंदर्यीकरणाच्या आणि वाहतुकीच्या सोयीसाठी हे पाऊल उपयुक्त ठरणार आहे, यात शंका नाही. मात्र, नगरकरांच्या मनात ‘अप्पू हत्ती’चे स्थान कायम आहे आणि हेच कारण आहे की अनेकांनी प्रशासनाकडे मागणी केली आहे की सर्कलच्या एका भागात अप्पूला छोटेखानी जागा द्यावी.
संवेदनशीलता जपणं गरजेचं
रसिक ग्रुपचे अध्यक्ष जयंत येलूलकर यांचे म्हणणे लक्षवेधी आहे. त्यांनी स्पष्टपणे सांगितले की, शहर विकास महत्वाचा असला तरी, भावनिकदृष्ट्या जुळलेल्या अशा चिन्हांना विसरणे योग्य ठरणार नाही. शहराच्या आधुनिकतेत अप्पूची आठवण ठेवणं हीही एक प्रकारची संस्कृती जपण्याची जबाबदारी आहे.
चौकाचे नाव मात्र तेच राहणार
शिल्प बदलले, चौकाचा चेहरा बदलला तरीही नगरकरांच्या तोंडी या ठिकाणाचे नाव ‘अप्पू हत्ती चौक’ असेच राहणार आहे. शहर विकासाच्या ओघात जी काही नवनिर्मिती होत आहे, त्यात जुन्या ओळखीची थोडी जागा ठेवली तर प्रशासन आणि नागरिक यांच्यातील नातं अधिक घट्ट होईल, हे निश्चित.
