अजित पवार गटाची तिसरी यादी जाहीर ! अहिल्यानगर जिल्ह्यातून कोणाला मिळाली संधी ?

Ahilyanagar News : विधानसभा निवडणुकांच्या तारखा जाहीर झाल्यानंतर किंबहुना त्याच्याही आधी महायुती आणि महाविकास आघाडी या दोन्ही आघाड्यांत जागावाटपावरून जोरदार खलबत चालू आहे. महत्त्वाचे म्हणजे आता निवडणुका अवघ्या काही दिवसांवर येऊन ठेपले असतानाही आणि अर्ज करण्यासाठी अवघा काही तासांचा काळ बाकी असतानाही या दोन्ही आघाड्यांत जागावाटपाचा नेमका फॉर्म्यूला अद्याप समोर आलेला नाही.

दुसरीकडे महाविकास आघाडी आणि महायुती मध्ये समाविष्ट असणाऱ्या घटक पक्षांनी आपापल्या अधिकृत उमेदवारांची नावे सार्वजनिक करायला सुरुवात केली आहे. ज्या-ज्या जागांवर तोडगा निघालेला आहे, त्या-त्या जागांवर वेगवेगळे पक्ष आपले उमेदवार जाहीर करतांना दिसत आहेत.

महायुती बाबत बोलायचं झालं तर महायुती मधील घटक पक्ष असणाऱ्या शिवसेना शिंदे गट, राष्ट्रवादी काँग्रेस अजित पवार गट आणि भारतीय जनता पक्षाने आपापल्या अधिकृत उमेदवारांच्या याद्या जाहीर केल्या आहेत. अजित पवार गटाबाबत बोलायचं झालं तर आत्तापर्यंत अजित पवार गटाने उमेदवारांच्या दोन याद्या जाहीर केल्या होत्या.

दरम्यान, अजित पवार यांच्या पक्षाने नुकतेच आपल्या उमेदवारांची तिसरी यादी जाहीर केली आहे. या यादीत एकूण चार मतदारसंघांसाठी अजित पवार यांनी आपले उमेदवार जाहीर केले आहेत. यात अहिल्यानगर जिल्ह्यातील एका उमेदवाराचा देखील समावेश आहे.

अजित दादा यांनी जाहीर केलेल्या या तिसऱ्या यादीत पारनेर विधानसभा मतदारसंघासाठी उमेदवाराची घोषणा करण्यात आली आहे. पारनेर विधानसभा मतदारसंघासाठी महाविकास आघाडी कडून शरद पवार गटाने उमेदवार दिला आहे. शरद पवार गटाने पारनेर चे माजी आमदार तथा नगर दक्षिणचे वर्तमान खासदार निलेश लंके यांच्या धर्मपत्नी राणी लंके यांना उमेदवारी दिलेली आहे.

यामुळे राणी लंके यांच्या विरोधात महायुतीकडून कोणाला उमेदवारी मिळणार याबाबत गेल्या अनेक दिवसांपासून नगरच्या राजकीय वर्तुळात चर्चा रंगत होत्या. अखेर कार आज या चर्चांना पूर्णविराम मिळणार आहे. कारण की राणी लंके यांच्या विरोधात अजित पवार गटाने उमेदवार उतरवला आहे. अजित पवार गटाने काशिनाथ दाते यांना राणी लंके यांच्या विरोधात उमेदवारी दिली आहे. अर्थातच पारनेर मध्ये दोन पवारांच्या गटात भिडंत होणार आहे. यामुळे पारनेर विधानसभा मतदारसंघाची यंदाची लढत ही खूपच लक्षनीय राहणार आहे.

अजित पवार गटाची तिसरी यादी
गेवराई – विजयसिंह पंडित
फलटण- सचिन पाटील
निफाड – दिलीपकाका बनकर
पारनेर – काशिनाथ दाते