Ahilyanagar News: कोपरगाव- तालुक्यात मंगळवारी (दि. ६) दुपारी साडेचार वाजण्याच्या सुमारास अचानक आलेल्या वादळी वाऱ्यासह अवकाळी पावसाने जोरदार हजेरी लावली. या नैसर्गिक संकटामुळे शेतकऱ्यांपासून ते सामान्य नागरिकांपर्यंत सर्वांचीच तारांबळ उडाली. वादळामुळे झाडे कोसळली, विजेचे खांब वाकले, घरांवरील पत्रे उडाली, तर शेतातील पिकांचे मोठे नुकसान झाले. सुदैवाने कोणतीही जीवितहानी झाली नाही, पण आर्थिक नुकसान मात्र प्रचंड आहे.
झाडे कोसळली
शहरातील येवला रस्त्यावर मोठे झाड कोसळले, तर श्रीसाईधाम कमानीजवळ झाड विजेच्या डीपीवर पडल्याने वीजपुरवठा खंडित झाला. वृंदावन सिटी परिसरात रोशन सोळसे यांच्या घराचे दहा पत्रे उडून दूर पडले, तर त्यांच्या शेडवर झाड कोसळल्याने मोठे नुकसान झाले. सुदैवाने, शेडमध्ये झोपलेले ८० वर्षीय विश्वनाथ सोळसे यांना तातडीने बाहेर काढल्याने त्यांचा जीव वाचला. हॉटेल अपना समोरील लिंबाचे मोठे झाड कोसळले, तर माऊली मिसळ दुकानासमोरही झाड पडले. नवचारीजवळ परजणे वस्ती परिसरात विजेचे खांब पडले, आणि विद्युत तारांमध्ये अडकून दोन दुचाकीस्वार रस्त्यावर कोसळले, अशी माहिती स्थानिकांनी दिली.
शेतकऱ्यांचे मोठे नुकसान
वादळामुळे शेतकऱ्यांचेही मोठे नुकसान झाले. शेतात ठेवलेल्या कांद्याच्या चाळी उद्ध्वस्त झाल्या, तर कांदा आणि गहू भिजल्याने शेतकऱ्यांचे आर्थिक गणित कोलमडले. काही शेतकऱ्यांचा खळ्यावर काढलेला गहू आणि उभा असलेला गहू आडवा झाला. कैरी, आंबा आणि इतर पिकांनाही वादळाचा फटका बसला. शिंगणापूर, नवचारी, पढेगाव रस्त्यावर अनेक ठिकाणी झाडे पडली, तर पाण्याची डबकी साचल्याने रस्त्यांवरील माती दवली. या अवकाळी पावसाने १५ मिनिटांतच हाहाकार माजवला, पण हवेत गारवा निर्माण झाल्याने गेल्या महिन्याभरापासून उकाड्याने हैराण झालेल्या नागरिकांना काहीसा दिलासा मिळाला.
तातडीने भरपाई देण्याची मागणी
माजी उपनगराध्यक्ष विजय वाजे यांनी कोपरगाव नगरपालिकेवर टीका करताना सांगितले की, मध्यंतरी अतिक्रमणे हटवताना साईडपट्ट्या उकरल्याने येवला रस्त्यावरील झाड कमकुवत झाले आणि ते कोसळले. त्यांनी प्रशासनावर निष्काळजीपणाचा आरोप केला. दरम्यान, माजी आमदार स्नेहलता कोल्हे, कोल्हे कारखान्याचे अध्यक्ष विवेक कोल्हे आणि विजय वाजे यांनी वादळामुळे झालेल्या नुकसानीची तातडीने भरपाई देण्याची मागणी प्रशासनाकडे केली आहे.
