Ahilyanagar Gold Price : सोन्याचे दर सध्या अभूतपूर्व उंचीवर पोहोचले असून, अहिल्यानगर शहरात सोमवारी प्रतितोळा सोन्याचा भाव ८८,३०० रुपये नोंदवला गेला. सराफा व्यावसायिकांच्या मते, हा दर लवकरच ९०,००० रुपयांचा टप्पा गाठण्याची शक्यता आहे.
गेल्या तीन-चार महिन्यांत सोन्यात गुंतवणूक करणाऱ्यांना ८,००० ते १०,००० रुपयांपर्यंतचा परतावा मिळाला आहे, ज्यामुळे सोने हे केवळ दागिना नसून एक विश्वासार्ह गुंतवणूक पर्याय म्हणूनही पुढे येत आहे.
शेअर बाजारातील अनिश्चितता आणि जागतिक आर्थिक अस्थिरतेमुळे गुंतवणूकदारांचा सोन्याकडे कल वाढला आहे. सध्या सण-उत्सवांचा हंगाम नसल्याने सराफा बाजारात शांतता असली, तरी ३० मार्च रोजी येणारा गुढी पाडवा हा सण बाजाराला नवचैतन्य देईल, असा अंदाज व्यक्त होत आहे.
जागतिक पातळीवर डोनाल्ड ट्रम्प यांच्या अमेरिकेच्या राष्ट्राध्यक्षपदापासून राजकीय तणावात वाढ झाली आहे. या अस्थिर परिस्थितीचा थेट परिणाम सोने आणि चांदीच्या किमतींवर दिसून येत आहे. डॉलरच्या तुलनेत रुपयाचे मूल्य घसरणे हेही सोन्याच्या दरवाढीचे एक प्रमुख कारण आहे.
सराफा व्यावसायिकांच्या मते, सध्याच्या घडीला सोन्याची मागणी गुंतवणुकीसाठी अधिक असून, खरेदी-विक्रीतून बाजाराला गती मिळत आहे. मार्च महिन्यात लग्नसराई आणि सण नसल्याने ग्राहकांची संख्या घटली असली,
तरी गुढी पाडव्यानंतर बाजारात पुन्हा उत्साह संचारेल, अशी आशा आहे. या सणाच्या मुहूर्तावर सोन्याची खरेदी वाढण्याची अपेक्षा आहे, ज्यामुळे सराफा बाजार पुन्हा एकदा झळाळी मिळवेल.
सध्याची जागतिक परिस्थिती कधी स्थिर होईल, याबाबत अनिश्चितता कायम आहे. त्यामुळे सोन्याच्या किमती आणखी वाढण्याचा अंदाज व्यक्त केला जात आहे. सराफा व्यावसायिकांच्या म्हणण्यानुसार, पुढील महिन्यात सोन्याचा दर प्रतितोळा १,००,००० रुपयांपर्यंत पोहोचण्याची शक्यता आहे, विशेषतः येणाऱ्या दिवाळीच्या काळात.
सोन्यातील गुंतवणूक नेहमीच फायदेशीर ठरते, असे मत व्यावसायिकांनी मांडले आहे. मार्चनंतर बाजारपेठ सुरळीत होण्याची आशा असली, तरी सध्याच्या किमती आणि जागतिक घडामोडी पाहता,
सोन्याचे दर नव्या उच्चांकावर पोहोचत राहण्याची चिन्हे दिसत आहेत. गुढी पाडव्यासारख्या शुभ मुहूर्तावर खरेदीचा विचार करणाऱ्यांसाठी ही योग्य वेळ ठरू शकते, असेही नगरमधील सराफा बाजारातून सांगण्यात आले आहे.
