सध्या भारतातील वाहन क्षेत्रात वेगाने बदल होत आहेत. पेट्रोल आणि डिझेलच्या वाढत्या किमतीमुळे अनेक ग्राहक इंधन-प्रभावी (fuel-efficient) पर्याय शोधत आहेत. इलेक्ट्रिक वाहनांचा (EV) ट्रेंड वाढत असला तरी, चार्जिंगच्या सुविधांचा अभाव आणि किंमत अधिक असल्याने अनेक ग्राहक अद्यापही CNG कार्स पसंत करत आहेत. CNG कार्स ही सर्वसामान्य ग्राहकांसाठी किफायतशीर, कमी खर्चिक आणि प्रदूषणमुक्त पर्याय आहे. विशेषतः, जे लोक दररोज ५० किमी किंवा त्याहून अधिक अंतर प्रवास करतात, त्यांच्यासाठी CNG कार्स हा सर्वोत्तम पर्याय ठरतो. भारतीय बाजारात सध्या अनेक CNG कार्स उपलब्ध आहेत, पण उत्तम मायलेज, बजेटमध्ये परवडणाऱ्या आणि कुटुंबासाठी (फॅमिली कार) योग्य अशा काही गाड्यांची निवड करणे महत्त्वाचे आहे. या लेखात आपण अशाच सर्वोत्तम CNG कार्सबद्दल माहिती घेणार आहोत.
मारुती WagonR CNG – 34 किमी मायलेज
मारुती सुझुकीची वॅगन-आर ही अनेक भारतीय कुटुंबांची पहिली पसंती आहे. या कारमध्ये प्रशस्त केबिन असल्यामुळे पाच जण आरामात प्रवास करू शकतात. वॅगन-आर मध्ये १.० लिटर पेट्रोल इंजिन असून, ही कार CNG व्हेरिएंटमध्ये देखील उपलब्ध आहे. CNG मोडवर या कारचं मायलेज ३४ किमी प्रति किलो आहे. सुरक्षिततेसाठी यात EBD, एअरबॅग्ज आणि अँटी-लॉक ब्रेकिंग सिस्टम (ABS) देण्यात आले आहे. दैनंदिन वापरासाठी वॅगन-आर हा एक चांगला पर्याय आहे. किंमत: ₹६.५४ लाख (एक्स-शोरूम)
मारुती सेलेरियो CNG – 34 किमी मायलेज
भारतात सर्वाधिक विक्री होणाऱ्या कार्सपैकी एक असलेली मारुती सुझुकी सेलेरियो CNG ही देखील उत्तम पर्याय आहे. ही कार १.० लिटर पेट्रोल इंजिनसह येते, जे चांगली कामगिरी देते. CNG व्हेरिएंटमध्ये ही कार ३४.४३ किमी प्रति किलो मायलेज देते. पाच लोक आरामात बसू शकतील अशी जागा यात उपलब्ध आहे. सेफ्टीसाठी यात ABS, EBD आणि एअरबॅग्ज देण्यात आल्या आहेत. किंमत: ₹५.६४ लाख (एक्स-शोरूम)
टाटा टियागो CNG – 27 किमी मायलेज
टाटा टियागो iCNG ही देखील एक उत्तम आणि विश्वासार्ह CNG कार आहे. या कारमध्ये १.२ लिटर इंजिन आहे, जे CNG मोडवर ७३ HP पॉवर आणि ९५ NM टॉर्क निर्माण करते. ५-स्पीड मॅन्युअल ट्रान्समिशनसह येणारी ही कार २७ किमी प्रति किलो मायलेज देते. मारुतीच्या CNG कार्सच्या तुलनेत मायलेज कमी असले तरी, ही कार अधिक सुरक्षित आणि मजबुतीने तयार केली आहे. किंमत: ₹५.६५ लाख (एक्स-शोरूम)
३ पैकी कोणती कार आहे योग्य ?
जर तुम्हाला उत्तम मायलेज आणि परवडणारी CNG कार हवी असेल, तर वॅगन-आर आणि सेलेरियो CNG हे सर्वोत्तम पर्याय आहेत. जास्त ताकद आणि सुरक्षितता हवी असेल, तर टाटा टियागो CNG हा एक चांगला पर्याय ठरू शकतो. तुमच्या वापरानुसार योग्य पर्याय निवडून तुम्ही स्वस्त आणि किफायतशीर प्रवासाचा आनंद घेऊ शकता.
